TURA: North Garo Hills a·jani headquarter Resubelpara sambao tarienggipa ramani biap damgnio skatang cho·ani a·sel komibeoba te 30 nokdangrang, re·ruraanio neng·nikanirangko chagrongna nangtokenga ine u·iataha.
Jolo songdongenggipa manderangni u·iatani gitade, ia ramara Rome Rabha aro Daram Tekalang songni gisepo tarienggipa rama ong·achim.
“Ia ramani biap damgnio, hume pipe-rangko songna gita skatang cho·ani a·sel songni manderang, re·ruraanio neng·nikanirangko chagrongna nangtokengaha. Ia ramani biap damgnio skatang a·arangko cho·ani a·sel komibeoba ia ramani metre 400-mangni gitade champengatako man·aha aro songni manderang ia rama gita gari gorarangko salrurana man·jaengaha. Ia ramani biap damgniko cho·na nanggenchimode, uamang manderangna sub-way-ko tarie on·chengna nangachim,” ine Rome Rabha songni mande saksa suk ong·gija aganaha.
Iani bidingo songni manderang, ramako tarienggipa company aro PWD official-rango sing·doattokaha.
Ia ramao a·arangko cho·ani gimin kamko nirokenggipa mohori Altub Hussain aro department-o sing·andion, ia ramao a·a cho·aniko uamangba kragijani ong·a ine aganskaaha.
Ia ramako uamang bakan re·ange niegen aro nanga gita taridapna nanganirangko taridapgen ineba department official-rang ku·rachakaniko on·ataha.
“Maming chanchisamsoani grisa ia ramani biap damgnio a·arangko cho·ahakon aro ian uamangni gisik gri ong·aniko mesokaniba ong·aha. Mikkangchi iandakgipa project-rangko on·engon department-ni gita name nichengesa kamrangko on·na nanga. Ramako tarina a·arangko cho·na nanga inede chingaba ma·sia indiba manderang re·rurana gita maming cholrangko tarichenggija biap damgniko cho·anide gisik gri ong·aniko mesokanisa ong·a,” ine songni sakgipin mande aganskaaha.