TURA: West Garo Hills a·jani Selsella Block ning·o donggipa Melagri Govt LP skul nokko rika matchotgija galchipa ine Niksamso Garo Community Organisation (NGCO) matnangataha.
NGCO-ni parakatani gitade, ia skul nokko rikna gita 2023 bilsini January jao gong lak 44.79 tangkarangko Education department chamatenba, ia kamko Tura Lower Babupara-ni contractor saksana on·ahachim.
Ia skul nokko rikna chamatgipa tangka paisarangoni lak 16-kode okmanaha indiba kamkode matchotgija galchipe donaiaha ine NGCO matnangataha.
“Garo Hills-o sorkarini rikna on·gipa sorkari LP skulrangoni badita skul nokrangko matchotaha, uarangko chinga NGCO-ni gita am·sandion, Melagri Govt LP skul nokkoba matchotgija galchipaha ine chinga nikna man·aha. Ia skul nokko rikna 2023 bilsion sorkari sanction ka·ahani gimin kamko matchotna nangahachim indiba biapona re·ange nion, kamko matchotgija galchipe donakosa nikna man·aiaha,” ine NGCO-ni dilgiparang parakataha.
Ia skul nokni bidingo ta·raken sandirokatchina aro kam ka·gipa contractor-ni kosako nanga gita ja·kurangko de·china gitaba NGCO, a·dok sorkariko didiataha.