SHILLONG: Meghalaya a·doko sanna bananirangko on·ani cholrang namjani a·sel manderang neng·nikanirangko chagrongna nangtokenga ine Meghalaya Pradesh Mahila Congress (MPMC) matnangataha.
MPMC-ni president Joplyn Scott Shylla-ni parakatani gitade, a·dokni bang·bata sanchakram biaprangon doctor-rang, specialist-rang, nokrang, samrang chu·ongjaenga aro songadam nokdamrango health centre-rang namjani a·sel manderang neng·nikanirangko chagrongna nangtokenga.
Iandake a·doko sanna banani cholrang chu·ongjaengani a·selan manderang, gipin biaprangonasa re·ange sanna bananirangko ra·na nangtokenga aro bang·en tangka paisarangko koros ka·na nangenga ineba Shylla parakataha.
A·dokni dingtang dingtang biaprango donggipa primary health centre (PHC)-rangko namdapatchina aro district hospital-rangko namdapatenba, ia hospital-rango gital bosturangko donchina aro specialist doctor-rangko rakkichina gitaba MPMC-ni president, a·dok sorkariko didiataha.
A·dokni dingtang dingtang biaprango, mongsongbate songadam nokadamrango Pradhan Mantri Arogya Yojana aro Megha Health Insurance Scheme gita dakgipa health insurance scheme-rangko nambate nirokna man·na gita healthcare worker-rangko bang·bate rakkichina gitaba Shylla didiataha.
Indake ong·engon, a·dokni dingtang dingtang biaprango, mongsongbate diltubatgipa biaprango an·o donggipa me·chikrangko aro bi·sarangko nambate nirok sandina man·na gita mobile health unit-rangko kulichina aro outreach program-rangko ong·atchina gitaba Mahila Congress didiangaha.