TURA: Don Bosco School Rongkhon (DBSR)-o poraianggipa gitcham chatro chatrirangni grongpiltaiani ba ‘Alumni Meet’-ko re·anggipa Sonibar salo, DBSR-ni Alumni association, skulni auditorium-o ong·atangaha.
Skulni gitcham chatro chatrirangna skulni Principal Rev Fr Marthin R Marak, rimchaksoani kattarangko aganangaha aro ia tom·aniona re·bae bakko ra·ehani gimin gitcham chatro chatrirangko mittelpilangaha.
Ia tom·anio, Alumni association-ni general secretary Wallish A Sangma aro treasurer Sengran A Sangma, Alumni association-ni kamrangni gimin jinmana agan-talate on·angskaaha.
Ia tom·anio DBSR-ni gitcham chatro chatrirang apsan chanchirimangengon, dingtang dingtang cholrangchi tangka paisarangko chimongna, jekai on·gilani, food fest-ko ong·atani, membor register ka·ani aro uandakgipa program-rangko ong·atani bidingo chanchirimangaha.
Chol ong·pagijagipa chadamberangna, an·tangtangni man·a gita dakchakanirangko on·angkunaba Alumni association tik ka·e donangaha.
Alumni association-ko mangrakbatatna gita bilsio changgni dake tom·aniko ong·atnaba ia tom·anio tik ka·e donangaha.
Tom·aniko matchotatna gita skulni Principal Fr Marthin R Marak, gitcham chatro chatrirangna aganprakangengon, DBSR-ni ong·enggipa obostarangni bidingo talataniko on·angenba, ia skul, chasong gitalni chadamberangko tarina gita a·gilsakni seng·aniko on·engkua aro pilak kamrangkon niksenganiko aro chu·sokaniko man·engkua ine parakataha.
Gitcham chatro chatrirangni bakrimaniko mangrake rakkina gita iandakgipa tom·anirangko ong·atanio gamchatgipa ong·ani giminba Fr Marak aganaha.
