Ia changoba Garo Labour Corps-ko apsan biapon manigen

TURA: Bilsianti manirongbaenggipa Garo Labour Corps Day-ko ia changoba manina gita tarisamsoengon, ia chang 107-gipa Garo Labour Corps Day-ko skangoni manibaenggipa Tura-ni Babupara-on maniangtaigen ine tik ka·e donangaha.

Sombar salo, West Garo Hills a·jani Deputy Commissioner Vibhor Aggarwal aro Tura Municipal Board (TMB)-ni Chief Executive Officer Jude Rangku T Sangma-ni dilanichi, ia chang 107-gipa Garo Labour Corps Day-ko maniani bidingo dingtang dingtang dolrang, jekai Tura  Senior’s Citizens, Mother’s Union, Garoland State Movement Committee (GSMC), A·chik State People’s Front (ASPF), A·chik Conscious Holistically Integrated Krima (ACHIK), New Tura Development Committee (NTDC) aro uandakgipa dolrang baksa tom·e chanchirimangenba, re·baenggipa July-ni 16 tariko ia Garo Labour Corps Day-ko ia apsan biapon manina tik ka·e donangaha.

Ia salko manianiona, a·gilsak gimikni skanggipa dakgrikanio kamrangko dakchake on·na gita France a·songona re·anggipa pagitchamrangni nokdangrangko aro dingtang dingtang dolni dilgiparangko okamna gitaba tik ka·e donangaha.

Ia Babupara-o Garo Labour Corps-ko gisik ra·na rike dongipa cenotaph-ko pe·galani a·sel batanggimin sal somoirango so·sojengjeng ong·anirangko nikna man·ahachim aro da·o ia biapo gital cenotaph-ko rikna gita kamrangko a·bachengskaengahachim.

A·gilsak gimikni skanggipa dakgrikanio India a·songni British sorkari, A·chikrangonikoba sak 500 matgrikrangko English aro bakrimgimin dolrangna dakchake on·na gita France a·songona watatahachim. Ia dakgrikanio English aro bakrimgipa dolrang, German-rangko warachakengachim aro ua biapona A·chikrangko bosturangko chiltimna, ramarangko tarina aro uandakgipa kamrangko ka·timna rimangahachim.

Ia kamna A·chikrangoniko sak 1000 matgrikrangko rimahaoba, sak 500-kosan seokaiaha aro ia sak 500-oni mitamrangde ramaon siangahani gimin sak 456 matgrikrangsan France a·songona sokangaiahachim.

Ia dakgrikani 1918 bilsini May 25 tariko bon·aha aro dakgrikani matchotahaon A·chikrangko India a·songona watatpilna gita France a·songni Marseilles port-ona watataha.

France a·songoni re·bapilenba A·chikrang 1918 bilsini July 16 tariko Tura-ona sokbapilaha indiba France a·songona sokanggipa sak 456 matgrikrangoni sak 120-san noktangona tange sokbapilaiaha.

Iani giminsa Garo Labour Corps Day-ko 1918 bilsionin bilsiantian Garo Hills-o, ka·dongbee a·gilsak gimikni dakgrikanio sorkaritangna dangdike on·na re·angahani gimin July 16 tariko manirongenga.