Police-rangna gisik ra·atpiltaianiko on·a
TURA: Re·anggipa 2024 bilsio, Garobadha bazar-o me·chik bi·sa saksako kragija dake kal·akgipa Bappa Ghosh-ko police-rang da·onan rim·na man·kujaenga ine A·chik State People’s Front (ASPF) Garobadha unit parakatenba, dos dakgipa mandeko ta·raken rim·china gita police-rangna gisik ra·atpiltaianiko on·angaha.
ASPF Garobadha unit-ni parakatani gitade, dos dakgipa Bappa Ghosh-ni kosako Garobadha-ni NGO-rang, police-rango FIR ka·ani ja·man ia mande, 2024 bilsini August 2 tarik dipetan gimachipe dongenga aro da·alonan uni bidingo maming koborrang dongkujaenga.
“Ia mande, Garobadha jolo donggipa Misikona songni me·chik bi·sa saksako kragija dake kal·akani gimin uni kosako NGO-rangni dakchakanichi me·chik bi·sani ma·drangrang FIR ka·ahachim. Ia mandeni kosako FIR ka·aoni da·o bilsisa ong·na sipilengahaoba, ia mandeko rim·ani ba ia mandeni gimin police-rangoni maming u·iatanirangko man·soa dongkuja,” ine ASPF Garobadha unit-ni dilgiparang janapatenba, dos dakgipa mandeko rim·ani bidingo maming u·iatanirangko man·soa dongkujaengani a·selan kal·aka man·gipa me·chik bi·sani nokdang aro jat gimikan kakket bichalko man·kujae suk ong·tokjaenga ine parakataha.
Indake ong·engon, ia a·selni bidingo police-rangni sandirokaniko u·iatchina, dos dakgipa mandeko rim·na gita ta·rake kamrangko ka·china, kal·aka man·gipa me·chik bi·sa aro uni nokdangna chel·chakanirangko on·china aro ia obostani bidingo badi ka·gipa dolrang aro jatni dilgiparangna u·iatjringchina gita ASPF Garobadha unit, West Garo Hills a·jani Superintendent of Police (SP)-ko didiataha.