SHILLONG: A·doko ILP-ko ra·gatna Meghalaya Legislative Assembly-ni ma·mong sorkari baksa agangrikna namnike ra·chakaoni bilsi 5 batengaha indiba ma·mongo BJP NDA sorkari, ILP-na dongimin niam gimik, mol·mola, tom·ani aro gisik ra·atpilanirangko dakna mikgri gita dongenga.
Ia ru·uatatani kamrang baksana NPP-ni MDA sorkari rikenggipani kosako HYC chadrapaha jeon gipin a·songoni napdrabenggiparangni mamlao chanchina nanggipako gisiko nangangjaenganina a·dok sorkariko matnangaha.
“Gipin a·songoni bang·a manderangni niamgri a·dokona napbadraengani mamlako a·doko sorkari gisiko nange ra·jaenga,” ine HYC President, Roykupar Synrem aganaha.
A·doko ILP-ko ra·gatna nangani mamlao Union Home Minister-ko New Delhi-o grongdilna MLA-rang gimikko ba party gimikko rimangna Meghalaya sorkari chanchia dongja ine HYC matnange aganaha.
“Da·alona kingking ma·mong sorkari iani bidingo nienga inen chinga gimikan nika aro ma·sia. A·doko ILP-ko maini gimin ra·gatna man·jaenga chinga ma·sina man·jaenga, kakketko agangenchimode Assembly-an iako senggnang ra·bana man·a gitade ma·mong sorkariko mol·molna resolution-ko ra·chakgipa ku·rang ge·sa ong·a,” ine HYC aganaha.
A·dokona niamgri napdrabaenggipana chanchina nangchongmotgipana agan-talate on·aniko ma·mong sorkarioniko aganchakaniko dabienga, ia apsan kamna a·dok sorkariba gisiko nangbate ma·mong sorkariko mol·molna nangenga.
Batanggimin adita bilsirango Citizenship Amendment Act-ni bidingo so·sojengjeng ong·gipa ma·mong sorkari ra·gataoni momentum-ko on·e Meghalaya-o ILP-na dabibaenga.
Ma·mong sorkario skangoni da·ona dabiangkuenga, dabianiko dingtang dingtang pressure group-rangchi a·doko Meghalaya Residents Safety and Security Act-ni original Act-ko ra·gatna dabina tariaha.
