SHILLONG: Bengaluru-o Meghalaya House-ko December bon·achibara rikchakatgnok ine a·dok sorkari parakataha.
A·dokni guest house-ko chalaianio ru·utatani bidingo student dolrangoni agan-janapanirangko man·engani jatchio uko chalaniko parakataha. Bengaluru-o a·ako brena aro nokko rikna Cabinet chanchimanaha aro kamrangko ka·anirang matchotnasiengaha ine Education Minister Rakkam A. Sangma u·iataha.
“Pilak tangka-paisa nangarangko gamanaha. Nanga kamrangko ka·a matchotahaode nokko pakwatgnok aro chalaignok,” Sangma aganaha.
“Cbhinga tangka gamaha, chinga nokko tariaha aro anga gualaniko dakjaode November ba December jana skang jagni jagittamo Bengaluru-o Meghalaya House-ko rikchakatgnok,” ua agandapaha.
Sorkarini gita pilak nanga kamrangko ka·a matchotaha. Breani kamrang matchotaha aro ru·utgijaan jagni ba ja gittamni gisepo Meghalaya House-ko chalaignok. Man·a dipet ta·rakale chalaina chinga ta·raken kamko ka·enga,’’ minister aganaha.
Lekka-porana, kam ka·na aro gipin gipin nanga kamrangna jemangan Bengaluru-ona re·anggen Meghalaya-oni poraigiparangna aro manderangna ia guest house dingtangmancha dakchakani ong·gen, Sangma aganaha.
Ru·utgija salmangmango KSU Bengaluru Unit, a·dokoni poraigiparangko aro kam ka·giparangko dakchakna Karnataka-ni skotongo Meghalaya House-ko ta·raken a·bachengatchina uamangni dabiako janaptaiaha.
Bengaluru-o Meghalaya-ni manderangni neng·nikanirangko chagrongani batroroako janape KSU Bengaluru Unit president Donboklang Nongphud, a·dokni guest house-ko a·bachengatna namen ru·uatani bidingo chanchiako janapaha.
