SHILLONG: Assam baksa simani bidingo gnigipa bako agangrikanio kragipa gadango simako tik ka·china, Meghalaya-ni song damsakoba galjachina raken nina nanganiko UDP MLA aro Ri-Bhoi a·jolni committee-ni member Mayralborn Syiem aganaha.
Ri-Bhoi district gisepo dingtangmancha meligrikgijagipa dam dok a·jolrang Borduar, Deshdoomreah, Block II aro Maikhuli Domreah sepangogipa a·jolo sima-arini songrangni obostani gimin chanchiako Syiem janapaha. Tom·tome aro agangrikani nangchongmotgipa ong·engako janape Meghalaya-ni toksangipa a·jako rakkiani non-negotiable ong·na nangchongmota ine ua aganaha.
Meghalaya-ni a·a Meghalaya-ni ong·na nangchongmota aro daitoko ra·giparangni gisepo ku·cholsan ong·cbina, dakna nangchongmotgipako chu·sokatna committee-na manderangni bakrimani mongsonggipa ong·a, ua aganaha. Indakgipa obostao chanchisogijao neng·nikaniko chagrongenga, uni gimin namedake simako tik ka·na nanga, Syiem aganaha.
Skanggipa bakni agangrikani matchotaha, da·o gnigipana agangrikna tarienga. Gnigipa gadango adita bakrang matchotaha ru·utgija salo West Khasi Hills-o aro gipin bakrango golmal ong·angaha, Syiem aganaha.
Joltango jegrike, nanggrike matnanggrikani gita neng·nikaniko man·aha indiba a·dok damgnini sorkarirang ma·sichakgrike namataniona ra·baaha. Apsan obostao gnigipa bakoba jeko man·a Meghalaya bil donga uarangko galgija a·dok damgnina namgni ong·ako nie kamko ka·china ua aganaha.
Assam official-rang baksa bakrimani mongsonggipa ong·a aro Ri Bhoi a·jolni committee chairman aro Deputy Chief Minister Prestone Tynsong uni apsan gadang baksa kam ka·gen Syiem ka·donge janapaha.
Ja·kuantio simsake kam ka·na kenchakani donggipa a·jolko nangrime nichina aro nambate chanchina, ua aganaha.
Sorkarini kam ka·anirango dakchina aro chakchikkuchina ua songpanggiparangko didiaha. Sima-ni bidingo golmal ru·uta somaioni ong·a, MDA-I aro MDA-II sorkarirang dolgnian obostako namedake nie kamko ka·e simako tik ka·china didiaha.
Assam aro Meghalaya-ni simani bidingo meligrikgijanirang sam 12 donga. Re·anggipa bilsini March-o a·dok damgnian dam dokan Gizang, Tarabari, Boklapara, Khanapara-Pilingkata, Ratacherra, aro Hahim ia simarangko Union Home Minister Amit Shah-ni dongpao agreement soi ka·aha, Agreement-ni gita, Assam skanggipa gadango gimik gimang 36.79 sq km-ko man·pilaha.
Bangki dam dok a·jolrang-Langpih, Borduar, Deshdoomreah, Block I-II, Pisar-Khanduli, aro Nongwah-Mawtamur (Garbhanga) ong·a.
