Assam-Meghalaya sima arini bidingo agangrikaniko a·bachengtaianio ru·utnaba donga: Tynsong

SHILLONG: Assam-Meghalaya a·dokrangni gisepo sima ario meligrikgijako namatna jotton ka·engon agangrikangani gnigipa bakko a·bachenganio ru·utnaba donga, maina Assam, mikkang bilsini assembly election-na tarisoaniko jakchakgija ong·enga.
Deputy Chief Minister Prestone Tynsong, jean interstate border talk ba sima ario meligrikgijaniko namatna bikotgipa Ri-Bhoi regional committee-ko dilenggipa ong·a, uan Phase 2-ni gita, meligrikgijagipa sima ari jolrangona re·ange nirok-sandianiko dakna gita Assam-chipakoniko nichake dongenga ine aganaha.
“Assam regional committee-oniko mamingkon kobor u·iataniko man·sokujaenga. Ri Bhoi jolnade, regional committee-ni sakgni-sakgittam chairman-rang donga indiba chingni regional committee-ode anga saksasan chairman dongaia, uni gimin anga uamangni on·ata tarikko nichake dongenga,” ine Tynsong aganaha.
Assam-o mikkang bilsi assembly election donga, uni giminba Assam-ni official-rang sima ari jolrangona nirok-sandina re·na gita somoi olgrokna man·jaengakon.
Iarangni gimin haida sima ario meligrikaniko namatna agangrikaniko a·bachengtainio aro kamrangko ka·angnio ru·utabatnaba donga. Meghalaya, mikkangchi re·mikangna tarie dongenga, aro ta·raken joint inspection ba nirokena nangnikengachim. Beben chinga wachi karini somoio adita neng·nikarangko chagrongaha indiba September ja bon·angchibarade, Assam-chipakniba kam ka·na re·mikkanganiko ka·dongsoenga, jedakode chinga apsan meligrikgijagipa sima ari jolrangona re·ange nirokena man·gen ine Tynsong agankuaha.
Block I aro Block II-ni gimin janapatengon Tynsong, indine aganaha, “Itihasko niatgenchimode gimikan u·ia, 1950-ni notification-o talen mesoka, ua jolrangko sorkarini gita Karbi Anglong-na transfer ka·aha uni gimin ua jolko Meghalaya-na walpilchina, Assam sorkariko mol·molna sika.
Pnar aro Karbi jatni manderang ua jolo bang·bea ineba Tynsong aganaha.
“Dolgnian an·tangtangni a·ja ine ua biaprangko a·akngenga, uni gimin ia mamlako committee, asonge name dake chanchirimna nangenga.”
Iarangni gisepon Tynsong, gimik stakeholder-rangko chanchike sengkuna mol·molaha.
A·dok damgnini sorkari, sima arini bidingo agangrikengan baksa district level-oba dolgnina kamrangko ka·enga.