Williamnagar: Mejaomangmang South Garo Hills-o ka·saninggija misilpile mande so·otaniko knaani ja·man da·obatai East Garo Hills Williamnagar-o mande so·otako nikna man·taiaha. July 18 tariko Williamnagar-o ong·gipa obosta, namen jagokatgipa ong·a.
Social media-o mande so·otgipani video gipaha. Dos dakgipa James R Sangma-ko meja bilsioba POCSO case-o biming nakataha. Uan meja July 18 tariko bilsi 19 ong·gipa me·chikko ka·saninggija so·otaha.
A·sel ong·aoni dos dakgipa police-oni kate dongenga, uko rim·na gita police dol, neng·takgija sandienga.
Iana skangba meja bilsio James Sangma, POCSO Act-ni ning·o gipin case-o jak dongpagipa ong·a.
Bilsi 19 ong·gipa sianggipa me·chikara poraienggipa ong·achim aro James-ni ripeng ong·achim. Indiba maini a·sel so·otaha iako da·onaba talna man·kujaenga. Sianggipa aro dos dakgipa sakgnian Williamnagar Dawa Matchakolgre-oni ong·a. Indake ong·engon, so·ota man·gipani photo aro video-rangko dingtang dingtang social media-rango watanirangko nikna man·engon indake chanchininggija aro ka·saninggija misilbegipa kamrangara so·ota man·gipa nokdangni manderangna aro songsul noksulni manderangna namen namgijaona sokatgen unbaksana so·ota man·gipani nokdangni manderangko mande ra·gijani gita ong·a. Uni gimin iandake misilbegipa kamrangko WhatsApp, YouTube aro dingtang dingtang social media-rango watjachina East Garo Hills-ni Superintendent of Police Office-oni u·ataniko on·ataha. Ia mikrakataniko on·atengani gisepon saoba manigija dakdragenchimode ba social media-rango watgenchimode uamangni kosako sandianiko daken aro niam gita ja·ku de·anggen ineba SP Office-oni mikrakataniko on·ataha.
