SHILLONG: A·dokni gitcham Cabinet minister aro Chief Minister Conrad K Sangma-ni adatang James PK Sangma-ko a·dokni gital Rajya Sabha MP songna sienga ine manderangni chanchichipanirangko a·dokni Deputy Chief Minister aro National People’s Party (NPP)-ni state president Prestone Tynsong jegalatenba, da·o dipet iani bidingo party-ni gita maming chanchia dongkuja ine talataniko on·angaha.
James PK Sangma-ko Rajya Sabha-ni MP-na NPP-ni gita nominate ka·ani bidingo sing·anina aganchakaniko on·angengon, ua an·tangde iani bidingo maming koborko man·soa dongkuja aro ian manderangni chanchichipe agananisan ong·aia ine Tynsong parakataha.
A·dokni Rajya Sabha MP WR Kharlukhi-na dongimin term, re·baenggipa 2026 bilsini June jao bon·na siengahani gimin uni biapo NPP-ni working president James PK Sangma-ko Rajya Sabha MP songskana miksonganirang donga ine manderangni gisepo chanchichipanirang ong·katengani gimin NPP-ni state president aro a·dokni Deputy CM, ia talataniko on·angaha.
A·dokni Rajya Sabha MP ong·enggipa WR Kharlukhi, kamtangko ra·taina nangnikjaengahani gimin bang·a manderangan, uni biapo sako Rajya Sabha MP songskana sienga, uarangko sandina a·bachengtokahachim.
2024 bilsio ong·atanggipa Gambegre by-election-oba James Sangma susagija, Chief Minister Conrad K Sangma-ni jikgipa Mehtab Chandee A Sangma-kosa NPP-ni candidate dake susaatskaaha aro uan chegipaba ong·ahachim. Iandakgipa obostarangko nikna man·ahani giminba mitam manderang, James Sangma-ko a·dokni gital Rajya Sabha MP ong·skana sienga ine chanchichipsoanirang ong·katahachim.
NPP-oni mitam dilgiparangni u·iatani gitade, Gambegre by-election-o James-ni susagija Mehtab Chandee-ko susaataniara ong·gakanisan ong·ja indiba Rajya Sabha-ni MP ong·e politics-ona re·bapilna gita chanchisamsogiminan ong·engachim.
Rajya Sabha MP-ni seat-ko on·ani bidingo Sangma-ni nokdang aro NPP-ni chubatgipa gadangoba chanchirimanaha indiba da·o dipet iani bidingo NPP-ni dilgiparang parakna gita nangnikkujaenga ine kobor on·timgiparang parakataha.