TURA: North Eastern Hill University (NEHU) Tura Campus-o mongsonggipa official-rang dongjani a·sel dingtang dingtang kamrangko ka·anio neng·nikanirangko chagrongna nangenga ine NEHU-ni Post Graduate Students Union (PGSU)-Interim parakatenba, Tura Campus-o mongsonggipa kamrangko gapatchina NEHU Tura Campus-ni Pro-Vice Chancellor (PVC)-ko didiataha.
“Batanggimin bilsirango NEHU Tura Campus-oba lekka poraniko on·anio, chatro chatrirangko ra·anio aro jolo songdongenggipa manderang baksa bakrimanio bang·en namdapaniko nikna man·aha indiba da·alonan campus-ko chalaianio mongsonggipa gadangni official-rang dongjani a·sel dingtang dingtang neng·nikanirangko chagrongna nangkuenga. NEHU Tura Campus-o Deputy Registrar aro Assistant Registrar gita dakgipa official-rang dongjani a·selan chatro chatrirangni kamrango, campus-o kam ka·giparangni kamrang aro lekkarangko tarianio neng·nikanirangko chagrongna nangenga,” ine PGSU-Interim parakataha.
PGSU-Interim-ni u·iatani gitade, NEHU Tura Campus-o gapatna nangenggipa mongsonggipa kamrangara, Deputy Registrar, Deputy Registrar-ni Personal Assistant, Assistant Registrar (Administration), Section Officer, Assistant, Upper Division Clerk (UDC) aro Lower Division Clerk (LDC)-ni kamrang ong·a.
Registrar aro Deputy/Assistant Registrar-ni gadangrangara university-ko chalaianio mongsonggipa gadangrang ong·achim ine janapatengon, NEHU Tura Campus-o dongkame kam ka·nagipa Deputy Registrar aro Assistant Registrar-ko ta·raken songe on·china NEHU Tura Campus-ni PVC-ko PGSU didiataha.
“NEHU Tura Campus-o iandake mongsonggipa kamrangko ka·gipa official-rang dongjani a·selan University-ni mongsonggipa kamrangko ka·anio ja·donggaatako man·na nangenga aro dingtang dingtang department-rangni gisepo kamrangko ka·anio neng·nikanirangko man·na nangenga,” ine PGSU-Interim-ni vice president Chakram D Sangma parakataha.