RESUBELPARA: Batanggimin sal somoirangonin Garo Hills-ni dingtang dingtang biaprango gari, motorcycle aro scooty cha·uanirangko knasona man·engon, North Garo Hills a·jao police-rangni rakbee kam ka·anichi, cha·ugimin scooty bolgniko North Garo Hills a·jani police-rang man·taiaha.
Police-rangni u·iatani gitade, North Garo Hills a·jao gari gora aro scooty cha·ugiparangko am·sandianio, Assam Goalpara a·jao donggipa Tengasot songoni bilsi 20 ong·gipa Palsrang R Marak ba Chusrang-ko police-rang rim·na man·aha aro ia mandeko sing·sandienba police-rang, cha·ugimin scooty bolgniko man·pilaha.
Iani bidingo police-rang, Resubelpara Police Station-o mokordomako segataha aro rim·a man·gipa mandeko bichal ka·na gita kacharina pakwatataha.
Iana skang re·anggipa Bristibar salosan North Garo Hills a·jani police-rang, cha·ugimin scooty bolsako man·ahachim aro ia scooty baksana Arjun S Marak minggipa mandekoba rim·na man·ahachim.
Re·anggipa bilsirangonin North Garo Hills a·jani dingtang dingtang biaprango gari gorarangko, mongsongbate scooty-rangko cha·ue kataniko bang·en knasona man·ahachim.
Cha·ugipa manderangko rim·na gita police-rang rakbee kamrangko ka·na a·bachengataha aro uandaken da·o police-rang, gari cha·ugiparangko rim·na man·engaha aro ia manderangni cha·ugimin gari gorarangkoba man·pilengaha.
