SHILLONG: Meghalaya a·doko niam gri toll gate-rangko kulina man·jana gita a·dokni pilak ramarangon mikrakbate nirokchina United Democratic Party (UDP)-ni dilgipa aro Nongpoh-ni MLA Mayralborn Syiem didiataha.
Syiem-ni parakatani gitade, a·dokni ramarango niam gri kuligipa toll gate-rangko chu·gimik chipatsrangna man·kujaengoba batanggimin bilsi 10-na skangko hisapede da·o a·doko obostarang namkalbataha.
Bilsi 15-na skangde, national aro state highway-rango baditaba dam toll gate-rangko kulie tangka paisarangko gile ra·rongachim ine janapatengon, iandakgipa toll gate-rangara, niamko pa·sike niam gri tangka gile ra·gipa gitasan ong·aia ine UDP MLA parakataha.
Niam gri tangka gile ra·aniko champengna a·dok sorkari, iandakgipa toll gate-rangko bang·en chipattokahani gimin da·o a·dokni ramarango dingtanganiko nikna man·engaha ineba ua aganaha.
Niam gri kuligipa toll gate-rang da·o namen komiahaoba, mikkangchi iandakgipa toll gate-rangko kulie, gari gorarangoniko tangka gile ra·na man·jana gita mikrake nirok sandianirangko dakna nangkuenga ineba Syiem parakataha.
Da·ororo GST, Forest aro uandakgipa niamrangko rakkina gitasa a·dok sorkari, mobile check gate-rangko chalaina on·enga ine janapatengon, iandakgipa check gate-rangba niam gri tangka paisarangko gile ra·na man·jana gita nirok sandianirangko dakna nanga ine Syiem aganaha.
Da·o dipet Nongpoh-ni national highway ramarango ua an·tangde niam gri chalaienggipa toll gate-rangko nikna man·jaha ineba ua aganaha.