SHILLONG: Meghalaya a·doko, mongsongbate Garo Hills-o bang·a skulrangan sorkarini nirok sandianirang dongjani a·sel obosta namjabatroroengaha ine adita salrangna skang, Opposition dolko dilenggipa Mukul Sangma, a·dok sorkariko matnangatani ja·man, skulrangko namdapatanio seoka man·gipa pilak dilgiparangkon ku·cholsan bakrimchina gita a·dokni Education Minister Rakkam A Sangma didiataha.
Garo Hills-o skigiparang chu·ongjaengoba, Lower Primary (LP) aro Upper Primary skulrangko a·dok sorkari, nirok sandijaengani a·sel skulrangni obostarang namjabatroroengaha ine Opposition dolko dilenggipa Mukul Sangma, a·dok sorkari aro Education Minister-ko matnange aganahachim ine nikna man·a.
Uni iandake matnange agangipa kattarangna aganchakaniko on·angskaengon, skulrangko namdapatanio dingtang dingtang neng·nikanirangko chagrongna nangengoba sorkari, ka·sinsin skul nokrangko taridape on·na man·engaha aro skigiparangkoba kamo ra·na a·bachengengaha ine Education Minister parakataha.
Mukul Sangma-ni Chief Minister ong·engmiting somoirango a·dokni skulrang mai obostao ong·achim, uarangni giminba Rakkam, gisik ra·atpiltaianiko on·angaha.
“Mukul Sangma-ni Chief Minister ong·engmiting somoirango, sorkari skul nok te·sakoba rike on·jaha aro iako an·ching darangan gualjana. Angni pagipaan private primary skulo skigipani kamko ka·achim indiba ua somoirango maming namdapaniko nikna man·jachim,” ine Rakkam aganaha.
A·dokni skulrangko namdapatna gita sorkarini ka·enggipa kamrangni bidingo janapatskaengon, “Chief Minister Conrad K Sangma-ni dilanichi, hajalni hajal skul nokrangko rikna aro taridapna man·engaha. Meghalaya a·doko dam 14,000-na baten skulrang donga aro da·o dipet chinga 3000 ba 4000 skulrangkode namdapatna man·engaha. Skul nokrangoni 50 percent-ni gitade taridape on·aniko nangkuenga,” ine Education Minister aganaha.
An·tangni Rongara-Siju constituency-ni gimin janapatskaengon, ua MLA scheme-ni tangkarangoniko skul damprakna gong lak 2 ka·e koros ka·anichi dam 45 Adhoc aro SSA skulrangko taridape on·na man·aha ine Rakkam parakataha.
MLA sakprak bilsio dam 50 skulrangko jako ra·e taridapgenchimode, a·dokni lekka porani gadangko namen dingtangatna man·gen ineba Education Minister, pilak MLA-rangnan ku·pattianiko on·angaha.
Apsan daken MP, MDC aro gipin dilgiparangkoba, a·doko lekka porako namdapatna gita man·a dipet tangka paisarangko on·gilchina gita Education Minister didiataha.
“Hai an·ching saksa sakgipinko matnanggrike dongaigija, an·tangtangni agana gitan kamkoba ka·e mesokna, Sakgipinko jaksi ote dongaigija an·ching sakantian skulrangko rikanio bakrimna,” ine Rakkam aganaha.