SHILLONG: Mendipathar-oni South Garo Hills a·jaona rel rama tariangna manchianiko dingtang dingtang dolrang jegalatahaoba, South Garo Hills a·jaona rel rama tariangna nangnikaniko a·dokni Cabinet Minister aro Rongara-Siju constituency-ni MLA Rakkam A Sangma paraktaiaha.
Sangma-ni aganani gitade, South Garo Hills a·jaona rel gariko ra·angna man·genchimode, ian bading chiwalanirangko tang·doatasan ong·aigija, South Garo Hills a·jao kam ka·e cha·na cholrangkoba bang·en nakatate on·gen.
Iani bidingo kobor ra·timgipa manderang baksa agangrikengon, “Mendipathar-oniko Nongalbibra gita ba Tura, Tikrikilla, Dalu aro uandakgipa biaprang gita Baghmara-ona rel ramarang tariangchina didie anga chief minister-na seatmanaha aro anga bebera·a an·chingni Chief Minister Conrad K Sangma, ia mol·molaniko India sorkariona ra·angchongmotgen,” ine Sangma aganaha.
A·dokni namroro silroroanina rel gari gita dakgipa kolrangko nangenga ine Chief Minister ma·sia aro iako chu·sokgipa ong·atna ua kam ka·chongmotgen ineba ua, an·tangni ka·dongchakenganiko parakataha.
South Garo Hills a·jana rel garirangko nangchongmotenga ine janapatengon, India a·songni jakgitelaniko man·na skang, ia jolrang, East Pakistan (da·o Bangladesh) baksa bading chiwalgrikanio namen chu·sokgipa ong·achim indiba India a·songni jakgitelaniko man·aonin ia jolrang baksa bading chiwalgrikanirangba bon·aiaha ine a·dokni Education Minister parakataha.
Baghmara-ona rel garirangko ra·angani namgniko janapatengon, ia jolrangona rel ramarangko tariangna man·genchimoba ja·mano Bangladesh aro gipin biaprang baksaba bading chiwalgrikna cholrang ong·katgenchim ine Sangma aganaha.
Rel ramarangko tarianganichi, tourism, gama ge·ani aro re·a doanirangoba bading chiwalani cholrangko ong·katatgen aro manderangni sorkari kamrango pangchakaniko komiatna dakchakgen ineba ua aganaha.