TURA: Garo Hills-o game ge·e cha·giparang, an·tangtangni game ge·e man·gipa bosturangko ru·uta somoirangna done pale sim·e cha·na man·na gita Cold Storage ba game ge·e man·gipa bosturangko ka·sine rakkiani ostrorangko on·china Meghalaya Pradesh Youth Congress (MPYC), a·dokni Chief Minister Conrad K Sangma-ko didiataha.
“Adita salrangna skang, angni Garo Hills-ni dambonga a·jarangona wenangani somoio anga game ge·e cha·giparang, salanti me·su pale cha·giparang aro self help group (SHG)-rangni neng·bee janggi tanganiko nikna man·aha. Me·chikrang aro game ge·e cha·giparang, sal ding·ako chake, an·tangtangni game ge·e man·gipa bosturangko palna nangenga ine anga nikna man·aha. Uamang an·tangtangni game ge·e man·gipa bosturangko salsani gisepo palna sim·na man·jagenchimode uarangko indin galna nangaiaha ine uamangni agananirangko anga knabana man·aha,” ine MPYC-ni president Timjim K Momin, Chief Minister-na sedoatgipa chittio parakataha.
Momin-ni parakatani gitade, Garo Hills-o game ge·e cha·giparang, bosturangko ka·sinate rakkiani kolrang dongjani a·sel aro gipin biaprangona an·tangtangni game ge·e man·gipa bosturangko palatskana man·jaengani a·sel 30%-oni 40%-mangni gitade noksan ong·atako man·ronga aro iani a·selan game ge·e cha·giparang, an·tangtangni game ge·e man·gipa bosturangko dam nom·e palna galna nangenba, janggi tanganio neng·nikanirangko man·rongenga.
Game ge·e cha·giparangni iandakgipa neng·nikanirangko chel·chakna gita pilak district headquarter-rangon cold storage hub-rangko donchina, songadam nokadamrangoba mini cold room-rangko donchina aro game ge·e cha·giparang, an·tangtangni game ge·e man·gipa bosturangko dingtang dingtang biaprangona watskana man·na gita cholrangko tarie on·china gita MPYC-ni president, a·dokni Chief Minister-ko didiataha.