TURA: Kharkutta jolo gimaenggipa me·chik bi·sako rim·gittanganio jak donga ine potchipenggipa Sonjith Arengh-ko North Garo Hills a·jani police-rang sandienba, Mitegittim minggipa songoniko rim·na man·aha.
Ia mandeko Adokgre police station-ni police-rang, jolo songdongenggipa manderangni dakchakanichi rim·na man·aha.
Police-rangni u·iatani gitade, ia mande, a·dokoni katna miksongengachim aro da·o Mitegittim songo dongnue dongengachim.
Re·anggipa July 19 tariko me·chik bi·sani gimaangaonin songni manderang aro police-rang, ia mandeko rim·na sandiengachim aro uandaken Bristibar pringo uko, songni manderangni dakchakanichi Mitegittim songoniko rim·na man·aha.
Ia me·chik bi·sa, re·anggipa July 19 tarik Sonibar sal dipet, uni nok sambaonin gimaengachim aro ia me·chik bi·sako, Sonjith Arengh minggipa mandean rim·gittanga ine me·chik bi·sani ma·drangrang aro songni manderangba police-rangna badi ka·aha.
Ia mandeko rim·na man·ahaoba da·o dipet me·chik bi·sakode man·pilskakujaenga.
Indake ong·engon, rim·ako man·gipa Sonjith Arengh-ara 2017 bilsio, Kharkutta Police Station-ni POCSO case-oba matnanga man·gipa mande ong·achim ine police-rang u·iataha. Ua somoio ua jamin man·e pattokoni jokaha aro ia case-nan ua district court-o bichal ka·ako man·engkuachim.
2015 bilsioba ia mandeni kosako minggipin POCSO case-ko ka·taoaha aro untalan ua kate dongengachim ineba police-rang u·iataha.
