SHILLONG: Shillong songjinmani Khyndailad ba Police Bazar ramao bostu palbadinggiparangko apjitatani ja·man sorkari, ia ramao gari gorarangkoba re·na on·jana tik ka·ahani gimin ian manderangna maming neng·nikani gri re·rurana aro koros ka·na chol ong·gnok.
Ia Khyndailad ramao bostu badinggiparangko adita salrangna skangsan sorkari, MUDA parking lot-o gital rikgipa stall-rangona apjitatahachim ine nikna man·a.
Mongolbar salo, a·dokni Deputy Chief Minister aro Urban Affairs Minister Sniawbhalang Dhar baksa tom·e chanchirimani ja·man kobor ra·timgipa manderangna talataniko on·angengon, ia Khyndailad jolrango gari gorarangko re·na on·gija manderangni ja·achi re·gipa biap ong·atna tik ka·aha ine a·dokni Tourism Minister Paul Lyngdoh parakataha.
“Khyndailad-o pring 7:00 bajioni wal 9:00 bajiona kingking gari gorarangko re·na on·jana tik ka·ahani gimin ian manderangna ja·achi re·ruraanio aro korosrangko ka·anio maming neng·nikanirang dongjawaha. Indiba skulni somoirango sorkari, skul bi·sarangko salna gitade pass-rangko on·gen aro unbaksana tanggitik a·sel ong·ani somoirangode chinga garirangko re·na on·na nangnaba gnang indiba chuttini salrangode ia biapo gari gorarang re·ruraani dongjawaha,” ine Lyngdoh aganaha.
Lyngdoh-ni parakatani gitade, ia jolrango songdongenggipa manderang, dongimin somoirango re·rurana man·na gita bakan Shillong Municipal Board (SMB), pass-rangko on·anggen.
“Ian gipin biaprango donggipa manderangnade ong·jawa indiba Khyndailad ning·o songdongenggipa manderangnasan ong·aigen. Ia jolo songdongenggipa manderangna pass-ko on·na gita chinga SMB-na pakwatmanaha,” ine Tourism Minister parakataha.
Khyndailad ramao bading chiwale cha·giparangko sorkarini apjitatanio Meghalaya High Court-ba chu·ongnikaniko parakahani gimin ua an·tangni kusi ong·aniko parakataha.
MUDA Parking Lot-ona apjitatako man·gipa badinggiparangna sorkarini ku·rachakgimin tangkarangko re·baenggipa August-ni 5 tariko, a·dokni Deputy Chief Minister aro ua an·tangan suale on·anggen ineba Lyngdoh parakataha.