Dominic Sangma, ‘Rimdogittanga’ (Rapture) jawilwat-o National Film Award-ko man·taia.

SHILLONG: Tura: Garo Hills-ni saksa jawilwat tarianio mingsingako man·gipa, Dominic Megam Sangma gnigipa changna, National Film Award-ko man·taie Meghalaya aro Northeast gimikna rasong mikkimko ra·bataiaha.
Dominic Megam Sangma-ni Garo ku·siko tarigipa “Rimdogittanga (Rapture) jawilwatni gita a·song gimiko namgipa bimingko ra·baanina Chief Minister Conrad K Sangma de·mmittele aganagaha, ian tribal jatni cinema-na mongsonggipa bak ong·a aro Garo jatni bimingko mikkim rasong chaatgipa ong·a ine ua aganangaha.
Dominic Megam Sangma, chang 71 gipa National Film Award-o uni gitalgipa jawilwat ‘Rimdogittanga’ (Rapture) jawilwato, Best Garo Film-na seokako man·e India sorkarini jakchi award-ko ra·chakangaha. ‘Rimdogittanga’ (Rapture) jawilwatko uni bebe ra·aniko ba golporangko ring·achi ba peodo-rangchi ning·tuaniko miksonganiko mesokanina aro Garo Hills-o janggi tangani bewalko, sianiko aro bebe ra·aniko  mesokanio nambatsranggipa ong·anio Award-ko man·aha.
Indake ia jawilwato, chonbegipa Kristian song damsao a·gilsakni bon·a sianiko jatni bebe ra·anio agansoani aro uana kensoanio gisikni gita so·sojengjeng ong·ani baksana Meghalaya-ni nitobegipa a·song chigana ka·pakaniko mesokaniba ong·a. Iano chu·sokgipa ong·na man·ahaniara, Dominic Sangma-ni mingsa Northeast India-oni bebe ra·aniko kattarangchi bilakbee parakanian ong·a.
Ia jawilwatko Dominic-chi direct ka·aha aro Anna Films banner-ni ning·o produce ka·aha, ‘Rapture’-ko bilsi 10 ong·gipa mikdo nanggipa me·a bi·sani mikronchi nikgipako  poet-o talataha. Jawilwatko bi·sa rim·srukenganina jangbingbanggipa kattarangchi songo noko so·sojengjeng ong·anio tariangaha.
National award-o tangka lak 2 boksis baksa Rajat Kamal (Silver Lotus)-ko jawilwatna on·aha, ian contemporary tribal cinema-o mongsonggipa bilakgipa ku·rangrang baksa ong·enga.
Satyajit Ray Film & Television Institute (SRFTI)-ni gitcham skie ra·gipa ong·e, Dominic uni jawilwato kam ka·anio, an·tangni chanchianirangko, a·gilsakni ong·telaigiparangko aro Garo jatni dalbewalo jadil su·gipa bebe ra·anirangko ning·tubee chanchibewale tariaha. Una agreba ua, Itanagar-ni  Film and Television Institute of India (FTII)-o Screenplay Writing Department-ni mongsonggipa ong·e dangdike on·enggipaba ong·a.
Meghalaya-ni creative industry-rangko bilakatna a·dok sorkarini gita ja·ku de·na miksonganio Chief Minister Sangma-ni katta aganao janapangaha.
State level Film Institute-ko a·bachengatna aro district film festival-ko ong·atna chanchienggipako Hello Meghalaya Integrated Grant Disbursement Event-o parakataha. Jawilwat tarigiparangko bang·bate ong·katatna dakchakna, regional institute-rang baksa bakrimaniko bilakatna aro Shillong-ni nalsao film culture bijangchi dakako komiatna miksonganio ia program-rang Meghalaya Film Toursim & Creative Media Policy 2025-ko draft ka·ani ning·o chanchisoe donengaha.
Ua saksa Northeast a·dokni golporangko agangipa ong·an baksana mikkangchi Northeast-ni gitalgipa chasongrangna golporangko aganrittingbaskana skie ongipaba ong·a. Uni dalgipa chu·sokgipa ong·ani bidingo  aganangskaengon, “Ia Award Meghalaya-ni pilak manderangnan ong·a, mongsongbate Garo Hills-ni manderangna. Ia chu·sokani, a·doko gipin jawilwat tarienggipa chadamberangna mikkangchi ka·donganina aro krengbatanina didiani ong·gen,” ine an·tangni ka·dongchakenganikoba parakataha.
‘Rapture’ jawilwatko mande ra·anganina Sangma aganangaha, indakgipa mongsonggipa ja·kuko de·anina de·mittelangaha aro cinema-ni gita jatni dakbewalrangko ripingenganina aro a·doktango changa sapaniko tang·doatenganina a·dok sorkari on·kanganiko bilakbatatna aganangaha.