SHILLONG: Opposition dolo Congress dolara, ‘mesni gandingko gangipa peru’ gita dakmikgipasan ong·aia ine Voice of the People’s Party (VPP)-ni matnanganiko Sombar salo, Meghalaya Pradesh Congress Committee (MPCC) jegalatenba, political party ge·antian dingtang dingtang ra·bianirangde dongaia aro party-ni ning·o saksa sakgnide iandake party-tango kakket ong·gijani dongaia ine talataniko on·angaha.
Congress dolni saksakamkam MLA Ronnie V Lyngdoh-ni NPP-o napangani ja·man VPP-na ku·wattimgipa Batskhem Myrboh-ni Congress dol gimikko matnange aganahani gimin MPCC, ia kattarangko aganskaaha.
MPCC social media department-ni chairman Lang Kupar Warjri-ni aganani gitade, political party ge·antian iandakgipa neng·nikanirangko chagronganide dongaia aro VPP-ba, uamangni MLA Adelbert Nongrum-ko apsan daken iandakgipa kamrangna suspend ka·ahachim.
“Darang political party-on iandakgipa obostarangde ong·aia. Kakketko agangenchimode, Opposition bench-o saksamangmang ‘perunade’ dongchakani biapba ong·ja,” ine Warjri aganaha.
VPP, Assembly-osan ong·aigija a·palrangoba mikrakatanirangko on·aha ine Myrboh-ni agangipa kattarangni bidingo janapatskaengon, ian ong·nade man·aia indiba VPP-san iako dakenga katta ong·ja ine MPCC-ni dilgipa parakataha.
Ru·uta bilsirangonin ia kamko Congress dolde ka·baengaha ine janapatengon, voter roll-rangko tol·e taridapna BJP-ni jotton ka·anioba Congress dolni dilgipa Rahul Gandhi, a·song gimikon jegalanirangko dakengaha ine Warjri aganaha.
Congress dolni iandakgipa kamara politics-ni dakrongbewalsan ong·ja indiba India a·songni niam bidikko tangatna dakgrikanisa ong·enga ineba ua aganaha.
Ronnie Lyngdoh-ni party-tangko wate NPP-o napangani gimin janapatskaengon, “Iade ua an·tangni skani gita ja·ku de·anisa ong·a indiba Congress dolde Meghalaya a·doko songdongenggipa manderangni ka·dongani aro ka·saaniko man·na ka·dongkuenga. Ian chingna, manderangni namgnina kamko ka·na gita gital dilgiparangko seokna cholko on·anisa ong·enga,” ine MPCC-ni dilgipa aganaha.