WILLIAMNAGAR: Sombar salo, Boko-ni Kaliabari-o donggipa Central Silk Board, SSPC (M)-ni gita, saksani Muga Field Day-ko East Garo Hills a·jani Williamnagar-o ong·atangaha.
Ia program-ko SSPC Kaliabari-ni Scientist-B aro In-charge Dharavath Saicharan dilangengon, Muga jo·ongko jilanichi, game ge·e cha·enggipa manderangna janggi tangani cholrangko on·na man·a ine talataniko on·angaha.
Ia program-ko ong·atanio, East Garo Hills a·jani District Sericulture Officer SG Momin aro Sericulture Demonstrator Charnenko Sangma-ba dongpae jinmana aganprakengon, muga jilani kamrangko namdapatchina, muga jile cha·enggiparangko didiangaha.
Ia Muga Field Day-ko ong·atanio, dingtangmancha muga jile cha·enggiparangna, muga jilanirangkoba dake mesokangaha aro muga jilanio nangchakegipa dingtang dingtang kamrangni giminba skie on·angaha.