TURA: Garo Hills Autonomous District Council (GHADC)-o kam ka·enggiparang, ja 42 batpile dormaharangko man·jaengani a·sel neng·nikanirangko chagrongna nangtokengon, kam ka·enggiparangna dakchakanirangko on·ani pal, gitcham Executive Committee (EC)-rangkosa a·dokni Chief Minister Conrad Sangma, dos galskaahani gimin Federation of Khasi Jaintia & Garo People (FKJGP) Garo Hills Zone, suk ong·gijaniko parakatenba, ia neng·nikaniko chel·chakna gita gital ja·kurangko de·skachina Chief Minister-ko didiataha.
“GHADC-o ong·enggipa obostako politics kal·gija, GHADC-ko chalaianggipa dingtang dingtang EC-rangni chu·sokgijanirangko namatna gitasa cholko ra·skana nangachim ine chingade chanchia. Mikkangchi GHADC-ko chalaianio maming dongnuani gri ong·na aro hisaprangko nambate rakkina gital niamrangko ra·gatna nangchongmotenga,” ine FKJGP GHZ-ni president Pritam Arengh parakataha.
GHADC-ni kamrangko namdapatna ja·ku de·aniara altua kam ong·jawa aro namen rakbegipa kam ong·gen ine ku·rachakangengon, ia kamo pilak political dolrang, songsalna kam ka·enggipa dolrang, Garo Hills-o songdongenggipa manderang pilakan bakrimna nanggen ine FKJGP GHZ-ni president parakataha.
GHADC-ko namdapatna gita uamang bakan, Meghalaya sorkari, political dolrang, aro gipin dolrangna ku·pattianirangko on·anggen ineba Arengh parakataha.
“GHADC-o ong·enggipa obostarangkode EC-mangmangchi, sorkarimangmangchi ba badiaba dolmangmangni kam ka·anichide namatna man·jawaha indiba ia neng·nikaniko namatna gitade, pilakni bakrimanikon nanggnok,” ine FKJGP-GHZ-ni president parakataha.