TURA: Ta·makku jakkalaniko champengna kam ka·ani bak gita Cigarettes & Other Tobacco Products Act (COTPA) 2003-ni ning·o West Garo Hills a·jani police-rang, mande jinmani biaprango skatang ta·makku ringgipa manderangoniko aro skul sepango ta·makkuni bosturangko palgipa dokkanrangoniko dai ra·aha aro uandaken ia 2025 bilsini skanggipa bako, king 1000-na baten challan-rangko on·aha aro gong lak 1.4 dairangko man·aha.
Police official-rangni u·iatani gitade, dairangko ra·anio, West Garo Hills a·jani Garobadha PIC, king 120 challan-rangko on·e aro gong 14,950 dairangko ra·e bang·batgipa ong·aha aro uni ja·man Dalu police station-oba king 86 challan-rangko on·e gnigipa ong·skaaha. Hallidayganj PS-oba king 85 challan-rangko on·e gittamgipa ong·aha.
“Chingni miksonganide manderangoniko dai ra·anisan ong·ja indiba manderangna ta·makkuni namgijaoniko naljokaniko on·anisa ong·a. Sakgipinrangni ta·makku ringanichi sakgipinrangsa namjabatgipa nangchakeanikode man·ani gimin chinga ta·makku jakkalgijagipa manderangko aro chadamberangko naljokatna iako dakenga,” ine West Garo Hills a·jani Superintendent of Police (SP) Abraham T Sangma parakataha.
Iandake mande jinmao ta·makku jakkalgiparangoniko dai ra·aniara, Health & Family Welfare Department, NHM Meghalaya-ni jako ra·enggipa National Tobacco Control Program (NTCP)-ni bak ong·enga aro iani bidingo police-rangna, Information, Education & Communication (IEC)-ni bosturang baksana training-rangkoba on·aha.
Ta·makku jakkalani namgijani bidingo, NTCP Meghalaya-ni State Nodal Officer Dr Nabneeta D Mawrie, talataniko on·angengon, “Cancer man·giparangoni 50%-de ta·makku jakkalani a·selan ong·ani gimin manderangna naljokaniko on·na gitasa police-rang, iandakgipa ja·kurangko de·na nangenga,” ine parakataha.
Mande jinmani biaprango aro skul sambarango ta·makku jakkalgipa aro ta·makku palgiparangoniko dai ra·engahani gimin manderangba police-rangni kamko mittelpilangaha.
