AMPATI: Assam a·doko niam gri songdong a·chaenggipa manderangko Assam sorkari a·rikgalengani gimin aro Bihar a·dokoba Special Intensive Revision (SIR)-ko dake, niam gri songdongenggipa manderangko sandiengani gimin a·rikgalako man·gipa manderang, Assam aro Meghalaya a·dok damgnini simarang gita napsrukbana man·jana gita sima jolrango check gate-rangko songe aro Task Force Committee-ko songe, niam gri napsrukbaenggipa manderangko mikrakbate nirikkichina Garo Students Union (GSU) Western Zone (South) Ampati, South West Garo Hills a·jani District Administration-ko didiangaha.
Iani bidingo, South West Garo Hills a·jani Deputy Commissioner-na seachi u·iatengon, “South West Garo Hills a·jao, mongsongbate Assam-Meghalaya a·dokni simarango, niam gri napsrukbae songdong a·chaenggipa manderang batroroengani gimin chinga iachi mikrakataniko on·na nangnikenga. Chingni kobor man·soani gitade, samba jolo donggipa a·dokrangoni aro a·songrangoniba bang·en manderang, niam gri napsrukbae songdong a·chatokenga aro ian South West Garo Hills a·jao mande jelbra jelsuaniko bariatani aro a·jao songdongenggipa manderangna kenchakna nanganiba ong·enga,” ine GSU-WZS Ampati-ni president Megadeth Mrong Marak parakataha.
Assam aro Meghalaya a·dok damgnini simarango niam gri napsrukanirangko mikrakbate nirikkijringchina didiatengon, Mirjumla, Jhunjuni, Aidoba, Garodoba, Garobadha aro Assam-Meghalaya a·dok damgnini gisepo nangdimegipa ramarang pilakon check gate-rangko songchina GSU mol·molataha.
Assam aro Meghalaya a·dok damgnini simarango, mongsongbate Jhunjuni, Kathuli, Jholgaon, Thakurunbari, Mirjumla, Ichakuri, Chandamari, Aidoba, Chondonpara, Bansali, aro Tepolpara songrango niam gri songdongenggipa manderangko ma·sina man·na gita ia songrango donggipa manderangni lekkarangko am·sandichina gitaba GSU, SWGH District Administration-ko didiataha.
“Assam aro Meghalaya a·dokni simarango niam gri napsrukbagipa manderang ma·chakengnaba gnang aro ia manderangko ta·raken am·sandijagenchimode ja·mano Tripura aro Manipur a·dok gitan apsan obostarangko Garo Hills-oba chagrongna nangnaba gnang,” ine Marak parakataha.
Niam gri napsrukanirangko nirikkanio GSU-ba, district administration aro police department baksa bakrimna kusi ong·aigen ineba ua parakataha.
SWGH-ni simarango niam gri napsrukaniko nambate nirokchina GSU dabia
Date:
Share post:
