TURA: Ma·mong sorkarini u·iatenggipa kamrangna Garo Hills-ni chadamberangba altuae porikkarangko sepana man·na gita Tura-oba examination centre ba porikka sechakani centre damsako kulie on·na rake kamko ka·gen ine West Garo Hills a·jani Deputy Commissioner Vibhor Aggarwal ku·rachakaniko on·ataha.
Iako West Garo Hills a·jani Deputy Commissioner, Sombar salo, Garoland State Movement Committee (GSMC)-ni dilgiparangna, Tura-oba UPSC exam centre-ko kulichina gita gronge agangrikeani somoio ku·rachakaniko on·ataha.
GSMC-ni general secretary Tony Tojrang B Marak-ni parakatani gitade, Garo Hills-ni chadamberangba ma·mong sorkarini UPSC, SSC aro PSU porikkarangko sena online gita dorgastorangko galpaenga indiba porikkarangko sena dorgasto galenggipa bang·bata chadamberangan songadam nokadamrangonisa ong·e chel·a biaprangona re·ange porikkarangko sepana chol ong·jaengani gimin Garo Hills-ni chadamberangna dingtangmancha Tura-o UPSC examination centre-ko kulichina didie, West Garo Hills a·jani Deputy Commissioner-ko gronge agangrikeaha aro memorandum-koba on·angaha.
“Chingni Deputy Commissioner baksa agangrikon, ua an·tangni DC ong·enga dipetde, Tura-o UPSC examination centre-ko kulina rakbee kamko ka·gen ine chingna ku·rachakaniko on·ataha. Iani bidingo ua ma·mong aro a·dokni official-rang baksa agangrikna gitaba ku·rachakaniko on·ataha,” ine GSMC-ni dilgiparang parakatenba, ia ku·rachakaniko on·ahani gimin dingtangmancha West Garo Hills a·jani DC Vibhor Aggarwal-ko mittelpilataha.
