TURA: Garo Hills Autonomous District Council (GHADC)-o kam ka·enggiparang, ja 43-ni dormaharangko man·kujaengani gimin dormaharangko on·china dabie, jasa batpile jingjengatanirangko dakengahaoba, uamangna a·dok sorkari aro GHADC-ni Executive Committee (EC), maming aganchakanirangko on·kujaengani gimin Opposition MDC-rangba, mijal August 13 tarikoni a·bachenge, GHADC office mikkango tom·tome jingjengatna a·bachengskaaha.
GHADC-o kam ka·enggiparang, batanggimin ja 43-ni dormaharangko man·tokkujaengani gimin Non Gazetted Employees Association (NGEA)-ni dilanichi, re·anggipa July 7 tarikonin, GHADC office sambao donggipa William Point-o asonge jingjengatanirangko dakengahachim ine nikna man·a.
Jingjengataniko a·bachengatani somoiode kam ka·giparangna bilsisani dormaharangkosan on·sochengchina NGEA dabiaiahachim indiba uamangni jasa batpile jingjengatanio, uamangna EC-ni dilgiparang, maming aganchakani ba ku·rachakanirangko on·jahani gimin da·o kam ka·giparangna chu·gimik ja 43-ni dormaharangkon on·china dabiskaengaha.
Chu·gimik ja 43-ni dormaharangko on·jagenchimode uamangni jingjengatanirangko dontongkujawa ineba NGEA mikrakataniko on·angaha.
Indake ong·engon, GHADC-o kam ka·giparangni dormaharangko on·china mol·molaniko da·onan chu·sokate on·kujaengani gimin aro uamangni mol·molanirangko knachakna gisiko nangjaengani gimin Opposition MDC-rangba, August 13 tarik dipet, GHADC office mikkango dingtang jingjengatna a·bachengskaaha.
“GHADC-o kam ka·giparangna dormaharangko on·na man·jaengani gimin chinga August-ni 1 tarikon a·dokni Governor-ko gronge, chingni nanganirangko janape on·aha indiba da·alonan chingna maming aganchakanirangko on·kujaenga. Uni gisepon chinga jingjengatenggipa NGEA-ni membor-rangkoba gronge, uamang baksaba uamangni asonge jingjengatanio bak ra·paaha. Uni ja·man chinga Deputy Commissioner-koba gronge, iani bidingo a·dokni Governor-na gisik ra·atpiltaianiko on·angaha. Indiba da·alonan chingni dabiani aro NGEA-ni dabianirangna a·dok sorkarioni aro EC-ko chalaigiparangoniba maming aganchakanirang dongkujaengani gimin chingni tik ka·gimin gita chinga Opposition-o asongenggipa MDC-rangba tom·tome jingjengataniko a·bachengatna tik ka·aha,” ine Opposition doloni aro Williamnagar-ni TMC MDC Alphonsus R Marak parakataha.
Opposition MDC-rangni Governor-ko gronge dabianggipani gimin janapatengon, re·anggipa July jao ong·atanggipa session-o Opposition MDC-rangni dabia gita dingtang dingtang nanganirangni bidingo chanchirimna jechakahani gimin GHADC-ni nangchongmotgipa kamrang, mongsongbate GHADC-o kam ka·giparangna ja 43 ong·pile dormaharangko on·na man·jaengani gimin chanchirimna Special Session-ko ong·atchina a·dokni Governor-ko mol·molahachim ine Marak parakataha.
2021 bilsini April jaoni da·o 2025 bilsini August jaona kingking GHADC-ni chang 14-gipa session-ko ong·atani gisepo, ming 10-mangni gita bill-rangko tarie Governor-ona watatahachim ine janapatskaengon, ia bill-rangoni mongsonggipa bill mingsade Codification of Garo Customary Law (GCL)-an ong·a maina ia niamko ru·utbea bilsirangonin A·chik jat nisenge dongtokenga indiba da·alona kingkingan ia Bill-ko a·dok sorkari, Governor-ni ra·chakanionan sokatkujaenga ine am·sandianio ma·sina man·aha ine Opposition MDC parakataha.
Una agreba Opposition MDC-rangni dabienggipa minggipin kamara, GHADC election-rango Non-Tribal-rang bak ra·pana ba susapana man·jana gita dingtang electoral roll-ko tarianian ong·enga ine Marak talataniko on·angaha.
