TURA: Garo Hills Autonomous District Council (GHADC)-ni ning·o donggipa dingtang dingtang biaprango namroro silroroaniko ra·bana gita ma·mong sorkarini chamatgipa tangkarangko a·dok sorkari, a·dokni kamrangna jakkalsretaha ine Budbar salo, Tura-ni MDC aro BJP-ni state vice president Bernard N Marak matnangataha.
Iani bidingo a·dokni Chief Minister Conrad K Sangma-na sedoatengon, Constitutional Amendment-ni 73-gipa aro 74-gipara, Autonomous District Council-rangni ning·o seoka man·gipa bimangrangchi, Sixth Schedule a·jarangko man·chape songko nokko chalaigiparangko mangrakbatatna miksonganisa ong·achim ine Marak, gisik ra·atpilaniko on·angaha.
“ANVC dolrang baksa ma·mong sorkarini songgigrikani ba Agreed Text for Settlement (ATS)-ni Para 1.1-on songko nokko chalaidilenggipa bimangrangko mangrakbatatna ku·rachakanisa ong·achim indiba NPP-ko dilgiparangni jak on·paani a·selan ia tangka paisarangko NPP-chi dilenggipa GHADC-ni Executive Committee (EC), ra·rikna man·jaha,” ine Tura MDC, Chief Minister-na sedoatgipa chittio janapataha.
Tura MDC-ni parakatani gitade, iarangni bidingo Urban Affairs Minister-na badi ka·ahaoba maming ja·kurangko de·jaha aro manderangna u·iatani gri Tura Municipal Board (TMB), tender-rangko on·skaaha.
“Angni kobor man·soani gitade, ia kamrangko nang·ni party-o bak ong·paenggipa contractor-rangnasa on·na sienga aro ia pilakan sorkariko chalaienggipa manderangni ge·etani a·selan ong·a. Iandake political dolrangni jak on·parongani a·selan district council-rangko chalaianio bilgriatako man·ronga aro tender-ko on·anioba parak ong·e dakanirang dongja. Unbaksana ma·mong sorkarini chamatgipa tangka paisarangkoba dingtang kamrangna jakkalaha aro mitam tangkarangkode NPP-chi chalaienggipa EC, dormaha on·na jakkalaha. Iani bidingo inquiry dakchina dabiahaoba maming ja·ku de·anirang dongkujaenga,” ine Marak parakataha.