TURA: West Garo Hills a·jani Rongchugre songo, British sorkarini somoio rikgipa Public Works Department (PWD)-ni Inspection Bungalow (IB)-ko da·o maming kamrangna jakkalgija galchipe donengani gimin Garo Hills aro Meghalaya a·dok gimikni namgnina ia IB-ni biapo gital project-ko rikskachina A·chik Holistic Awakening Movement (AHAM) Dadenggre regional unit, a·dokni Chief Minister Conrad K Sangma-ko didiataha.
AHAM dolni parakatani gitade, ia PWD IB-ko 1938 bilsirango British sorkarini somoiosa rikahachim indiba ia IB-ko ru·utbea bilsirangna galchipe donahani a·sel da·o ia IB-ni obosta namsrangjaha.
“Ia PWD IB-na Rongchu A·kingni Nokmasa a·arangko on·ahaoba ia nokko taridapna ba maiba kamrangna jakkalskana gita department-oni maming ja·kurangko de·a dongjaengani gimin iana songni nokni manderang suk ong·niktokjaenga aro A·king Nokmaba, ia biapo sorkari maiba namroro silroroani kamrangko ka·na gisik nangja ong·ode jatni bilo pangchake a·arangko ra·pilgnok aro ia a·ako sorkarina on·taijawaha ine aganmanaha. Uni gimin ia biapo gital project-ko a·bachengna gita ta·raken ja·kurangko de·china aro iana dingtangmancha gisikko on·china chinga didienga,” ine AHAM Dadenggre regional unit-ni dilgiparang, Chief Minister-na sedoatgipa chittio janapataha.
Ia galchipgimin IB-ko ta·raken niepilchina aro A·king Nokma baksana songni nokni dilgiparangko gronge agangrikena gita PWD official-rangna ge·etaniko on·chinaba AHAM, a·dokni Chief Minister-ko didiataha.
“Ia biapo gital project-ko a·bachengataniara Rongchugre songni manderangnasan ong·aigija, Garo Hills-na aro Meghalaya a·dok gimiknan namgni ong·gen,” ine AHAM Dadenggre regional unit-ni dilgiparang parakataha.