SHILLONG: Adita salrangna skang, Bangladesh a·songoni silchidare ra·bitgipa sakchet manderang, sima gita napsrukbae, Rongdanggai songni chadambe saksako chadrapani ja·man, sima ari jolrang gita a·dokona napsrukanirangko mikrakbate nirokchina a·dok sorkari, a·dokni pilak deputy commissioner (DC) aro superintendent of police (SP)-rangna ge·etaniko on·angaha.
Ia sakchet manderangoni sakdokkode songni manderang, police-rangni dakchakanichi rim·na man·aha aro da·o bangki dongkuenggipa mande sakgnikoba rim·na sandikuengachim.
Iani bidingo tom·e chanchirimangani ja·man kobor ra·timgiparangna talataniko on·angengon, “Batanggimin sal somoirango a·dokni simarango iandakgipa obostarangko bang·en chagrongna nangahani gimin pilak a·jani DC aro SP-rangkon, mikrakbate nirikkichina ge·etaniko on·angaha,” ine Bristibar salo, a·dokni Deputy Chief Minister aro Home (Police) in-charge Prestone Tynsong parakataha.
Tynsong-ni aganani gitade, East Jaintia Hills a·jaoni West Garo Hills a·jani Dalu jolrangona kingkingan Bangladesh a·songni simarango niam gri napsrukanirangko nikna man·enga.
“Sorkari mikraken kamko ka·enga aro anga bebera·a an·chingni police dolrang, niam gri napsrukbagipa manderangko rim·e, a·songtangona watatpilna man·gen,” ine ua aganaha.
Bangladesh a·songoni niam gri napsrukbagipa sakdok manderangko rim·ani ja·man a·dok sorkari, iani bidingo Home Affairs Ministry-na seachi u·iatmanaha ineba Tynsong parakataha.
Ia manderangoni saksa, jean ua biapo bretatgipa bosturangko galangahachim, uade police-rangoni joke, Bangladesh-ona katangpilna man·aha ineba a·dokni Home (Police) Minister parakataha.
“Ia mande, Bangladesh a·songona katangpilaha ine chinga chanchichipenga. Indiba ia manderangko rim·na an·chingni police aro BSF sipairang sandikuenga,” ine Tynsong talataniko on·angaha.
BSF dol jekai simarango, bilakbee nirok sandianirangko dakenga, apsan daken a·dokni police-rangba rakbee kamrangko ka·engani gimin gipin biaprangoni niam gri napsrukbaenggipa manderangko rim·na man·aigen ineba ua aganaha.