Tura: A·songni dingtang dingtang bakrango maniangan baksa Garo Hills-ni dam 5 district-rango a·songni 79-gipa Independence Day-ko Sukrobar salo tom·tome aro katchae maniangaha.
West Garo Hills, Tura-o Deputy Chief Minister, Sniawbhalang Dhar-chi a·songni nisanko badalataha aro 79-gipa Independence Day-ko New Tura, Matchakolgre L.P School Playground-o ong·atani somoio kolgrik bonga parade contingent-rangko Rastriya Salute ka·angaha.
Maniani somoio, ia bilsini MBOSE topper-rangna, Tura, Sherwood School-ni Esther D. Sangma; Don Bosco College Higher Secondary Section, Tura-ni Samridhya Das; aro Nev Sharma of Don Bosco College Higher Secondary Section, Tura-ni Nev Sharma, uamang baksanaba ICSE aro CBSE topper-rang, Nokrek Heights Higher Secondary School, Tura-ni Bakrime Rikande M. Sangma, aro Jeremiah Chemikkim M. Sangma of Tura Public School, Tura-ni Chemikkim M. Sangma-ko mande ra·ani gita Appreciation Award-rangko mongsonggipa sokgipachi on·angaha.
Flemington Nongrum, UDA-ko uni Indian Army-o bilsi 28-na dangdike on·anina aro West Garo Hills-ni Zila Sainik Welfare Office-o uni da·o kam ka·enganina Dhar mande ra·angaha. West Garo Hills-ni District School Education Officer-ni ning·o sakgipinrangnaba award-rangko man·anggiparangara, Bensing Ch. Marak, Medical Record Officer; Jehangir D. Shira, Grade IV, District Medical and Health Office; Deboras R. Marak, RCW, aro Amal Kr. Hajong, LDA, District Horticulture Office; Balwan R. Marak, Supervisory Assistant, Establishment Branch, Deputy Commissioner-ni office; aro Government Boys Higher Secondary School, Tura-ni Assistant Teacher Anne Tensie K. Marak.
Motorsport-o chu·sokgipa Aneesh M. Sangma-na aro Garo Hills-o pioneering music recording aro production-o Linthon M. Momin-na award-rangko on·angaha.
Parade kal·anio nambatgiparangna trophy-rangko aro certificate-rangko on·angaha,
Skanggipa gadango chegiparangara, Don Bosco Higher Secondary School Scout Troop aro St. Mary’s Higher Secondary School Guide Company, gnigipa gadango chegiparangara, St. Mary’s Higher Secondary School Scout Troop aro Christian Girls’ Higher Secondary School Guide Company. NCC contingent-rang baksana, Tura Government College NCC Boys aro Don Bosco College NCC Girls skanggipa gadango cheaha, gnigipa gadango chegiparangara, Don Bosco College NCC Boys aro Pechon Memorial Higher Secondary School, Tura ong·a.
WGH-ni gipin bakrang: Dadenggre Civil Sub-Division-o, Arbinstone B Marak, MLA Selsella Assembly Constituency-chi a·songni nisanko badalataha aro 2nd MLP Battalion Goeragre, Scouts and Guides-ni 13 marching contingent-rangko Rastriya Salute ka·angaha.
Raksamgre Civil Sub-Division-o, Raksamgre Assembly Constituency-ni MLA Limison D. Sangma mongsonggipa sokgipa ong·e Raksamgre-ni Matchokgre Playground-o a·songni nisanko badalataha.
Jengjal Civil Sub-Division-ni Jengjal Playground-o MLA Pongseng R Marak-chi a·songni nisanko badalataha.
Dalu Civil Sub-Division-ni Dalu Govt. Higher Sec. School Playground-o Brening A Sangma-chi a·songni nisanko badalataha.
South West Garo Hills, Ampati-oba 79-gipa Independence Day-ko Sukrobar salo maniangaha.
Deputy Speaker Shri. Timothy D. Shira-chi a·songni nisanko badalataha aro South West Garo Hills-ni Deputy Commissioner Smt. Hema Nayak, IAS aro Superintendent of Police Shri Vikas Verma IPS-ni dongpaanio Rashtriya Salute-ko Ampati Students’ Field-o dakangaha.
Deputy Speaker Shri Timothy D. Shira, a·dokni silroroani aro namroroanio pangchake manderangni gisiko dongenggipa sorkarini gita chu·sokatgiparangko kan·dike talatangaha. District-o poria skiani a·bako tang·doatanina district-ni administration aro stakeholder gimikona mua nama skaniko on·angaha.
Ampati DEF, NCC aro Scouts & Guides-ko man·chape 28 parade contingent-rangchi march past ka·angaha, nambatgipa chatro chatrirangna, kam ka·giparangna, health worker-rangna aro cholrangna unbaksana bi·sarangni kal·susaaninaba boksis-rangko aro award-rangko maniani salo on·angaha aro nitogipa culture programme-rangkoba ong·ataha.
South Garo Hills-ni Baghmara-o Norht Garo Hills-ni Kharkitta-oni MLA Rupert Momin-chi a·songni nisanko badalataha aro parade kal·giparang salam ka·angaha.
East Garo Hills-ni Rongrenggre Govt. Higher Sec. School Playground-o PHE-ni Minister Marcuise N. Marak-chi DC, RP Marak, SP, Stephen R Rynjah, joltangni dilgiparang, Nokma-rang, aro gipin dilgiparangnni dongpaani mikkango a·songni nisanko badalataha.
North Garo Hills-ni Resubelpara-o Power, Taxation & C&RD Minister, AT Mondal-chi a·songni nisanko badalataha aro 20 parade contigent-rangko Rashtriya Salute ka·angaha.
2032 bilsio a·dokni ming 10 baksana Meghalaya-ni nikjumangsoanirangko aganangani somoio dingtang dingtang a·barango a·dokni gita chu·sokanirangko aro kam ka·enganirangko Mondal aganangaha.
