Tura: Mikkang bilsio ong·atnasienggipa Garo Hills Autonomous District Council (GHADC) election-o gipin jatrangko susaatna gita party ticket-rangko on·jachina gimik political dolrangkon Achik Dedicated Integrity Leaders (ADIL) Phulbari Zone, West Garo Hills (WGH) didiangaha.
Mejaomang National Congress Party (NCP), election-o susaatna gita party-ni seokgimin candidate-rangni bimingni list-ko parakatgipao saksa gipin jatni biming dongani gimin uamangko bang·a manderang jegaltokaha, uni gimin gipin jatni bimingko list-oniko ra·galpilaha. Iarangni gimin ADIL, gimik political dolrangko mikkang bilsi 2026-o ong·atnasienggipa GHADC election-o gipin jatna party ticket-ko on·jachina aganaha.
“Uandake NCP-ni Shyamnagar Consituency-o susaatna gipin jatko seoke ra·galpilaniara a·doko songdongenggipa manderangna mande ra·aniko mesoka aro political-ni gita sikani dongode iandakgipa dal·gipa ja·kurangko de·na man·ako mesoka. Da·ode gipin political dolrangnaba ian mingsa mikrakatani gita ong·jok. Iarangni gisepon jinma manderangko, NGOs aro civil society-rangkoba jatna aro a·kingna apsan ong·e re·mikkangchina ADIL, agan-ku·pattiaha.
