SHILLONG: A·songni dingtang dingtang bakrang baksa Meghalaya a·dokoba 79-gipa Independence day-ko katchae aro kusi ong·e maniangaha.
A·dokni skotong songjinma Shillongo, Polo Ground-o J.N Stadium-o maniangaha jeon a·dokni Chief Minister, Conrad K Sangma-chi a·songni nisanko badalataha aro 35 Marching Contingent-rangko Rashtrya Salute-ko ba salamko ka·aha jeon Border Security Force, CRPF, East Khasi Hills Special Operation Team, 1st MLP Bn., 5th IRBN Arunachal Pradesh, NCC Boys & Girls, Meghalaya Bharat Scouts and Guides aro dingtanga dingtang skulrangoni bakko ra·angaha.
Police Medal for Meritorious Service-ko Billygraham R Marak, Commandant-na aro Allan Eddie Marbaniang, Asst. Sub Inspector-na, aro Fire Service Medal for Meritorious Service-ko Rokesh Warjri, Leading Fireman-na on·a maniani salo parakataha.
Maniani somoio, Shillong Home Guards Division, Home Guards-ni Divisional Commandant Badalyne Kharkongor-na aro Naik Parsing Ch Marak, Central Training Institute of Civil Defence & Home Guards-ni Naik Parsing Ch. Marak-na a·dokni Civil Defence & Home Guards Departmennt-oni Meritorious award-ko on·angaha.
Manianio, East Khasi Hills District-ni ning·o donggipa public aro private hospital-rangni MHIS-PMJAY scheme-ko nambate chu·sokatanina aro name kam ka·batanina certificate-rangko sualangaha. PHC-o nambate dakanina Dangar PHC-na award-ko on·aha, CHC-o nambate dakgipa Mawphlang CHC-na, Maternal & Child Hospital-o nambate dakanina Ganesh Das Govt. Maternal & Child Hospital-na award-ko on·aha aro private hospital-rangoni nambate dakgipa Nazareth Hospital-na award-ko on·aha.
March Past kal·anio chegiparangna boksis-rangko on·angaha jeon skanggipao gadango Loreto Convent School, gnigipa gadango BSF Girls Sec. School aro gittamgipa gadango St. Joseph Hr. Sec. School cheaha. Brass Band-o Sacred Heart Boys Hr. Sec. School, St. Margaret Hr. Sec. School aro Auxilium Girls Hr. Sec. School skanggipa, gnigipa aro gittam boksis-rangko man·angaha. Cultural programme-o skanggipa gadango Pine Mount Hr. Sec School, gnigipa gadango Auxilium Girl Hr. Sec. School, aro gittamgipa gadango St. Anthony’s Hr. Sec. School cheaha.
