SHILLONG: Mnisalo India a·song gimikon a·songni Jakgitelani bilsi 79 gapaniko manina am·engon Meghalaya a·dokni skotong songjinmao ma·sina man·gijagipa manderang Pasteur Beat House (BH), Shillong-o Police ni gari ko ‘Petrol Bomb’ chi chadrape jajrengataha.
A·songo jakgitelani salko manina nisamsoengon Sukrobar pring-walni 3:30 bajimango ma·sina man·gijagipa manderang bike bol gittamo re·baenba police dolni gariko nosto ong·atna jotton ka·aha, indiba ua somoi duty-o donggipa Police- rangni ‘petrol bomb’ ni kamna a·bachengmitingo ta·rake kimite galna man·e a·sel ong·aoniko chelchakna man·aha.
Ia obosta ong·a ja·man East Khasi Hills a·jani Superintendent of Police, Vivek Syiem, ni u·iatani gita Pasteur BH Official rangni jakkalenggipa gari ko u·ina man·gijagipa manderang Sukrobar pring-walni 3:30 bajimango bike bol gittamo re·baenba ‘Petrol Bomb’ chi godape gari kamchipna gita chadrapanio darangba saknaataniko man·jaha indiba gari ni do·ga adita nosto ong·atako man·aha, ine SP u·iatangaha.
Ia chadrapani bidingo Police dol maming mangsonganiko ma·sina man·jahaoba ua jolo jakkalenggipa CCTV footage rangoniko dos dakgipa manderangko sandina a·bachengatskaaha.
Indake a·songni jakgitelani somoio iandake Police dolni kosako chadrapani a·sel a·doko songdongenggipa manderangko kenjagokataona sokatahaoba sakanti manderangko gisik rake dongan baksana maiba kragija kamni gimin bakan sepangbatgipa Police dolrangna u·iatchina didiangaha.
Iana agreba batanggimin 2024 bilsio a·dokni skotong songjinmao ‘Petrol Bomb’ ni chadrapaniko nikangna man·aha, jeon damchet dingtang dingtang biaprango ‘petrol bomb’ galdape so·sojengjeng ong·atangahachim, je obostaon darang mandean saknaatako man·jahaoba ua chadrapanichi sorkari ni ning·o chu·gipa gadango kam ka·giparangko, Police Station rangko, aro ramram mande sakantini jakkaltogipa hospital aro uandake dingtang dingtang salantio jakkaltogipa sorkari ni nokrangko nisan ka·enganiko u·ina man·skaaha.
