TURA: Assam a·doko donggipa Agia-oni a·bachenge, Tikrikilla, Phulbari aro Rajabala gita Tura-ona dakbagipa National Highway (NH)-127B ramara, West Garo Hills a·jao songdongenggipa hajalni hajal manderangna mongsonggipa rama ong·e, janggi tangani chol gitaba ong·a indiba ia rama da·o jol gimikan a·kolrara dake nosto ong·tokengahani a·sel rama gita re·ruraenggipa manderang aro rama sambao songdongenggipa manderangba neng·nikanirangko chagrongna nangtokenga ine Centre for Environment Protection and Rural Development (CEPARD) parakataha.
“Da·o NH-127B ramani obostako nigenchimode namsrangjaha inesa aganna man·aigen. Ian NH ramasa ong·ani gimin manderangna re·togipa ramsa ong·na nangachim indiba ian ramako re·ruraenggipa manderangna chaktopilgijani neng·nikanikosa on·skaenga. Ia rama jol gimikan a·kolrara dakako nikna man·a aro mitamrangde garini chaka gimikkon naptompila. Badiaba badiaba bakrangode ramako reppigipa bitumen-rangba gil·gaotokaha aro wachini somoirangode a·dubekrara dake re·a doanio namen neng·nikanirangko man·enga,” ine CEPARD-ni president aro program head Samgar R Sangma parakataha.
Sangma-ni parakatani gitade, ia NH-127B rama namsrangjahani a·selan gari gorarang malama gitasa ka·sine re·na nangtokenga aro rama gimikon kenchakna nangani ong·e, a·kolrangko gelesa salna nangtokenga.
A·ran kariode ia ramarang a·dimurara dake, ramako re·nan nikpiljae kenchakna nanganiko ong·atenga ineba Sangma parakataha.
“Ia rama gita salanti re·rurana nanggipa manderangde aiao inmanpile neng·nikanirangko chakna nangtokenga maina office re·giparangba rama namtingjae ka·sindugae re·na nangengani a·selan baditaba konta skangrang re·na nangtokenga. Bading chiwale cha·paenggipa manderangba, rama namsrangjani a·selan an·tangtangni garirangna gitap gitap koros ka·na nange noksan ong·na nangtokenga maina rama namsrangjani a·selan garini dingtang dingtang bosturang ta·raken nosto ong·ningtokaia,” ine CEPARD-ni president parakataha.
Sangma-ni parakatani gitade, manderangko salruragipa bus garirangba, rama namsrangjani a·selan nosto ong·atako man·ronga aro uandaken bus gario songre songgabatenggipa manderang bang·a changon jachange dongna nangtokronga.
NH-127B rama namsrangjani a·sel chatro chatrirangan neng·nikanirangko chagrongna nangbatgiparang ong·a ine janapatskaengon, ia rama skul re·enggipa bi·sarangna namen kenchakna nangani ong·a aro bang·a somoirangon skul re·enggipa bi·sarang, a·dubekrang tang·dape, mitchi mitchi dakesa skulrangona re·angna nangronga ine Sangma parakataha.
Ia rama namsrangjahani a·selan sagipa manderangko aro an·o donggipa me·chikrangko hospital-rangona ra·anganioba neng·nikanirangko chagrongna nangronga aro mitamrangde ramaon sina aro an·pakna gitaba nangrongaia ineba Sangma parakataha.
Ia rama namsrangjahaoba, ramako tarigija nikja dake dongengani gimin CEPARD-ni dilgiparang, a·dokni Cabinet Minister aro Phulbari-ni MLA AT Mondal-koba matnangataha.
