TURA: Manderangna sanna bananirangko on·anio kamrangko name dangdike on·engani gimin South Garo Hills a·jao Bakdil dolchi chalaienggipa Siju Primary Health Centre (PHC)-naba India sorkarini Health & Family Welfare Ministry-ni gita National Quality Assurance Standards (NQAS) certification-ko on·aha.
Adita salrangna skangsan, West Garo Hills a·jaoba Bakdil dolchi chalaienggipa Babadam PHC-naba ma·mong sorkarini Health Ministry, ia NQAS certification-ko on·ahachim.
Ia NQAS certification-ara Quality Council of India (QCI)-ni ning·o sanna banani, sabisi sakanchirangko chel·chakani, rongtal an·talani aro dangdike on·aniko nina National Health Systems Resource Centre (NHSRC)-ni tarigipa chol ong·a aro Garo Hills gimiko Babadam PHC-ni ja·man NQAS certification-ko man·chenggiparangoni Siju PHC gnigipa ong·aha.
Ia Siju PHC-ko Bakdil dol, Public-Private Partnership (PPP) mode-o, chong·motan sorkari baksa nangrime chalaiengachim ine nikna man·a.
NHSRC-ni official-rang, re·anggipa July-ni 21 aro 22 tarikrango ia Siju PHC-ni kamrangko aro health centre-o man·enggipa cholrangko nisusaangon, 97.14% point-rangko man·aha aro ian Meghalaya a·dokni songadam nokadamrangoba sanna banani cholrang tang·doenganiko mesokani ong·aha.
Bakdil official-rangni u·iatani gitade, ia Siju PHC-ko uamang bilsi 16-na skang jako ra·e chalaina a·bachengon, dingtang dingtang neng·nikanirangko chagrongna nangkuengachim indiba PHC-o kam ka·giparang aro nirok sandienggiparang pilakan rakbee kamrangko ka·anichi da·alo ia PHC-o iandakgipa gadangona sokatna man·aha.
“Chingni ia certification-ko man·aniara chingna upattiko man·anisan ong·ja indiba chingni ka·dongani, chingni daitorang aro mande sakantian namgipa sanna bananiko man·na nanga ine chingni bebera·ani biterangsa ong·a. Chinga mikkangchiba apsan daken manderangna nambatako on·angkuna an·tangtangko on·kangenga,” ine Bakdil dolni official-rang parakataha.
