TURA: Indian Constitution-ni Article 3-ni ning·o Garoland a·dokko bikote on·china didie, Mongolbar salo Garoland State Movement Committee (GSMC)-ni dilgiparang, Union Tribal Affairs Minister Jual Oram-ko grongenba memorandum-ko on·angaha.
Indian Constitution-ni Article 3-ni ning·o, gital a·dokrangko bikotna aro a·dokni simarangko saltaina gita Parliament-na bilko on·a ine nikna man·a.
Union Tribal Affairs Minister-ko grongeanio dongpagipa GSMC-ni dilgiparangara, acting chairman Balkarin Ch Marak, Chevibirth Koknal, Tony Balsam Ch Marak, Amresh Ch Marak, Jason Tekrang aro gipinrang ong·a.
Union Tribal Affairs Minister-na sedoatgipa chittio GSMC-ni parakatani gitade, Garoland a·dokna dabiani, 1895 bilsimangon a·bachengaha aro ua somoirango A·chikrangni skanggipa political leader Pa Sonaram R Sangma, British-rangni sason ka·engmiting somoio A·chikrangna dingtang a·dokko dabidilahachim.
Pa Sonaram Sangma-ni ja·man Mody K Marak aro Emonsing M Marak gita dakgipa A·chik dilgiparangba, A·chikrangni songdongchakenggipa Assam aro Bangladesh a·songni Mymensing jolrangkoba Indian Union-o napatchina dabiahachim.
“Uni gimin A·chikrangna dingtang a·dokko dabianiara gital dabiani ong·ja aro Indian Constitution-ni Article 3-ni ning·o A·chikrangba dingtang a·dokko man·na nangani giminsa da·alo chinga New Delhi-ona re·bae, Garoland a·dokko on·china ma·mong sorkarina gisik ra·attaianiko on·angaha,” ine GSMC-ni acting chairman Balkarin Ch Marak parakataha.
Garo Hills Autonomous District Council (GHADC)-o ong·enggipa obostarangni giminba GSMC-ni dilgiparang ma·mong sorkari baksa agangrikangaha ine u·iataha.
“Chingni mol·molanirangko niatna gita Union Minister ku·rachakaniko on·ataha,” ine Marak parakataha.
