AMPATI: South West Garo Hills a·jani C&RD Block dambriko Mongolbar attamo, a·dokni Community & Rural Development (C&RD) Minister AT Mondal niangaha.
South West Garo Hills a·jani C&RD Block dambri, chong·motan Rerapara, Betasing, Zikzak aro Purakhasia block-rangko chalaianio mai dakgipa neng·nikanirangko chagrongna nangenga aro maikai chalaienga, uarangko Minister niangaha aro ia block-rangko nianganio Minister baksana Salmanpara-ni MLA Ian Botham K Sangma, SWGH a·jani Deputy Commissioner Hema Nayak aro DRDA-ni Project Director RZD Shira-ba dongpaaha.
Rerapara C&RD Block-ko niangani somoiode Rangsakona-ni MLA Subir Marak-ba dongpaaha.
Rerapara aro Zikzak-o C&RD Minister, gital rikenggipa block office-rangko niangaha aro Purakhasia block-oba ua, gital block office complex-na Nokmarangni on·gilatgipa a·arangko niangaha.
Ia block dambriko niangani somoio AT Mondal, songni manderangkoba gronge agangrikangjolaha.
Ia block dambriko niangani ja·man a·dokni C&RD Minister, Ampati-ni Circuit House-o tom·anikoba ong·atangaha aro ia tom·anio, Salmanpara-ni MLA, SWGH-ni DC, DRDA-ni Project Director, block dambrini BDO-rang aro dingtang dingtang officer-rangba dongpae bak ra·angtokaha.
Ia tom·anio, block dambrini kamrangko, MGNREGA-ni kamrangko aro dingtang dingtang scheme-rangko C&RD Minister nipilangaha.
