JJM-ni kamrangko audit ka·china CM ge·eta
TURA: Tura aro Shillong Medical College, Jal Jeevan Mission aro kal·susaani kamrangko nipilna gita Bristibar salo, a·dokni Chief Minister Conrad K Sangma, dingtang dingtang official-rang baksa Tura-ni Circuit House-o tom·aniko ong·atangaha.
Ia tom·aniko ong·atani bidingo officer-rangna talate on·angengon, kamrangko nipilasan ong·aigija, officer-rang an·tangtangni neng·nikanirangko parakna aro namdapatani cholrangko mesoke on·na miksonge ia tom·aniko ong·ataha ine Chief Minister parakataha.
Tura Medical College-ko rikani kamrangko nipilangengon, college-ko rikani kamrang da·o 78 percent-ni gita matchotaha aro 2026 bilsini September jaode matchotna ka·dongenga ine official-rang, Chief Minister-na parakataha.
Ia medical college-na dakanggipa dolong sambao rama chubeani a·sel neng·nikanirangko chagrongna nangenga aro iana dingtang biapko nina nangenga ineba official-rang aganaha.
Shillong Medical College-ni bidingo chanchirimangskaengon, ia medical college-ni class-rangko ia bilsini September jaon a·bachengna ka·dongenga aro admission-rangko 15 percent All India quota aro a·dokni dongimin niamrango pangchake ra·gen ine official-rang talate on·angaha.
“Shillong, Tura aro USTM medical college-rangko chalaina siengahani gimin 2030 bilsiode Meghalaya a·doko bilsiantian sak 550-na baten doctor-rangko ong·katatna man·gnok aro central pool seat-rango pangchakaniko komiatna man·gnok,” ine Chief Minister parakataha.
Kal·susaani aro kal·chakram biaprangko rikani bidingo chanchirimangengon, songadam nokadamrangonin a·bachenge chadamberangni kal·anio changa sapanirangko namdapatna gita kal·chakram biaprangko tarie on·na, kal·susaanirangko ong·atjringna aro changgipa sapgipa chadamberangna cholrangko on·na nangenga ine Chief Minister aganaha.
Jal Jeevan Mission (JJM)-ni kamrangko nipilangskaengon, JJM-ni report-rango 90 percent kamrangko matchotaha ine segenchimoba 20 percent-mangni gita nokdangrangde chirangko man·tokjaenga ine badi ka·anirangko man·soahani gimin ia scheme-ni ning·o darang nokdangrangkon watchangjana gita kamrangko nipile namdapatna a·dok gimikon audit-ko ka·china Chief Minister ge·etangaha.
JJM-ni tangka paisarangko ma·mong sorkarioni watatningjahani a·sel kam ka·gipa contractor-rangna gong kror 2000-mangni gita grorang donga ine janapatengon, ia pilak neng·nikanirangkon ia bilsini bon·angahaode namatna man·gen ine Chief Minister, an·tangni ka·dongchakenganiko parakaha.
JJM-ni chirangko pilak nokdangrangonan sokatna man·na gita kamrangko nambate ka·china aro neng·nikanirangko u·iatchina gitaba ua officer-rangko ge·etangaha.