TURA: Tura Medical College-ko Public-Private Partnership (PPP) mode-o ba private company baksa nangrime sorkarini chalaina tik ka·aniko Budbar salo, A·chik Holistic Awakening Movement (AHAM) jegalatenba, ia medical college-ko PPP mode-o chalaigenchimode re·baenggipa bilsirango Meghalaya a·dokni manderang, MBBS seat-rangko gimaatna nanggnok ine mikrakataniko on·angaha.
“Tura Medical College-ko PPP mode-o chalaigenchim ong·ode bilsi 66-ni gisepo Meghalaya a·dokni manderangna dam 4224 MBBS seat-rangkosan on·aignok indiba ia college-ko a·dok sorkari an·tangan chalaia ong·ode MBBS seat-rangko dam 8448-ona baridapatgen. Garo Hills-k medical college damsakosa man·paengani gimin ian Garo Hills-ni manderangna, mongsongbate chatro chatrirangna dal·bea gimaani ong·gen,” ine AHAM-ni president George Prince Cheran Momin parakatenba, ma·mong sorkarini on·enggipa dakchakanirangchi Tura Medical College-ko a·dok sorkari an·tangarin chalaichina didiataha.
Tura Medical College-na kamo ra·ani bilko Private Sector Entity (PSE) ba private company-na pakwatanikoba AHAM raken jegalataha.
“Medical college-rango kam ka·nagipa manderang haida Meghalaya a·doko chu·onga gita dongjanaba gnang indiba medical staff aro technical-o kam ka·giparangko ra·anio gipin company-rangsa bilko man·ahaode a·dokni reservation policy-ko ja·rikjawaha. Uni gimin ia college-na kam ka·giparangko ra·anio a·dokni Reservation Policy-ko ja·rikna nanga,” ine Momin parakataha.
Tura Medical College-ko PPP mode-o chalaia ong·ode college-ni fee-rangba nangana bate rakdugagen ine janapatskaengon, PPP mode-o chalaienggipa USTM-ni PA Sangma International Medical College & Hospital-o state quota-na bilsiprakon gong 4,95,000 ong·e MBBS course chu·gimiknade gong 24,75,000 ong·enga ine AHAM-ni president mesokatenba, Tura Medical College-koba PPP mode-o chalaigenchim ong·ode apsan daken fee-rang ong·aigen ine mikrakataniko on·angaha.
“Uni gimin Garo Hills-o songdongenggipa manderangna, mongsongbate kangal cholgri manderangni namgnina chanchie Tura Medical College-ko PPP mode-o chalaigija a·dok sorkari an·tangan chalaichina chinga mol·molenga,” ine Momin parakataha.