A·songni President aro Prime Minister-na sedoatgen: NGEA
TURA: Garo Hills Autonomous District Council (GHADC)-o kam ka·enggipa manderang, ja 44-ni dormaharangko man·kujaengani a·sel neng·nikanirangko chagrongna nangtokengani gimin kam ka·giparangna ia ja 44-ni dormaharangko chu·gimik on·china dabie Bristibar salo, GHADC-ni Non Gazetted Employees Association (NGEA) baksana Garo Hills gimikni dingtang dingtang dolrang, jekai GSU, FKJGP, ACHIK, ADE, AHAM, APA, AYWO aro gipin dolrang nangrimenba, jinma re·jomaniko ong·atangaha.
Ia re·jomaniko GHADC office-oni a·bachengatenba, Ringre, Babupara, Tura Bazar aro Hawakhana gita wenange, apsan biapon matchotateaha.
Jinma re·jomaniko ong·atanio, dingtang dingtang songni Nokma-Sordarrang, GHADC-ni Opposition MDC-rang, chatro chatrirang aro ramram manderangba bang·en bak ra·angtokaha.
Jinma re·jomako ong·atani ja·man GHADC office sambao jinma tom·bimonganikoba ong·atangaha aro ia tom·bimonganio NGEA-ni president Brithen M Sangma, jinmana aganprakengon, GHADC-o kam ka·giparang ja 44 ong·pile dormaharangko man·jaengani gimin re·anggipa July 7 tarikonin kamrangko dontonge jingjengatenga indiba da·alonan kam ka·giparangni man·na nangkuenggipa ja 44-ni dormaharangko on·na gita GHADC-ko chalaienggipa Executive Committee (EC) aro a·dok sorkari, ku·rachakanirangko on·jaengani gimin ia salni bako dingtang dingtang dolrangni bakrimpaanichi ia re·jomaniko ong·ataha ine parakataha.
Adita salrangna skangmangmang GHADC-o kam ka·giparangna jabongani dormahako on·na gita EC-ni parakatgipani gimin janapatskaengon, GHADC-o kam ka·giparangni jingjengataniko a·bachengmiting somoio uamang, bilsisani dormahako on·sochengchina dabiahachim indiba ua somoio EC-ni dilgiparang, uamangna maming ku·rachakaniko ba ka·dongatani kattarangko on·jahani gimin uamangni chu·gimik man·na nangkuenggipa dormaharangko on·china dabiskaaha aro iani giminsa uamang jabongani dormahako ra·chakna jechakaha ine Sangma parakataha.
GHADC-o kam ka·giparangna uamangni man·na nangkuenggipa chu·gimik ja 44-ni dormaharangko on·jaskal NGEA-ni jingjengataniko dontongjawa ineba Sangma parakataha.
NGEA-ni jingjengataniara ‘politics’-ni gita kal·anisa ong·enga ine mitam dilgiparangni agananiko NGEA-ni sakgipin dilgipa Timtim Sangma jegalatskaengon, ja 44-ni dormahako man·kujae chaktopilgijagipa duk mikchirangko chakna nangengon, GHADC-o kam ka·giparang an·tangtangni man·gnirangko dabina bil dongjama ine sing·doataha.
GHADC-o kam ka·giparangni man·na nangkuenggipa dormaharangko EC aro a·dok sorkari on·gija donchipangkua ong·ode uamang a·songni President aro Prime Minister-na lekka sedoatenba, uamangni neng·nikanirangko niatchina mol·molatgen ineba Sangma aganaha.
GHADC-o kam ka·giparang, ja 44-ni dormaharangko man·kujaengani gimin kam dontongate jingjengatani da·o jagni gapna siengahachim ine nikna man·a.
Photo: GHADC-o kam ka·enggiparangna ja 44-ni dormaharangko on·china dabie NGEA baksana dingtang dingtang dolrang aro dingtang dingtang biaprango songdongenggipa manderang jinma re·jomanio bak ra·enga.