SHILLONG: Voice of the People Party (VPP)-ni chief, Ardent Basaiawmoit, mejaomangmang Chief Minister Conrad K Sangma-ni matnangako maming orto grigipa matnangani ine aganaha.
“Chief Minister-ni VPP-ko matnanganiko niaton anga ‘se·el aro mesni golpokosa gisik ra·ataijok’ ine Basaiawmoit aganaha.
Bilo donge kam ka·enggipa NPP, bilsi 7 baten a·dokko chalaienga aro sak 33 MLA-rang donga indiomangba uamangni chu·sokgijanirangko donnuna gita opposition party- VPP-kosa jean bilsi bri skangsan re·bagipako matnangenga. Ka·namgijagiparangde pangnan uamangni gualaniko donnuna sakgipinkosa jaksi otronga ine Basaiawmoit agandapaha.
Chief Minister Conrad K. Sangma, meja Bristibar salo Voice of the People Party (VPP)-ko aro party-ni president Ardent Miller Basaiawmoit-ko uni constituency-ko nichanga maming development dongja ine matnangaha.
United Democratic Party-ni dilgipa Lambor Malngiang-ko National People’s party (NPP) -o rimchaksoani somoio jinma aganprakmitingo indine aganaha, “Opposition VPP, uamangni constituency-rango development-ni tangkarangko apsangrik sualama sualjama ine jajrengako parakaha.
