Pharomgre-o niamgri a·ningni gamjin bikotgipako Chokpot CSO-rang rim·a

Chokpot (SGH): South Garo Hills (SGH)-o Chokpot-ni ning·o donggipa Pharomgre biapo scientific mining mamlani kosako dakgrikangkuenganio dingtang dingtang civil organisation dolrang Sukrobar salo niamgri a·ningni gamjin bikote dongipako songsulni nokoniko rim·aha ia apsan dakgipakon skangoba joltangni police station-na pakawate on·angahachim.
Koborrangko CSO-rangni parakatani gitade, November 11 tariko Chokpot Civil SDO, State Pollution Control Board-oni official-rang aro police department aro gipin nangchapgipa sorkari official-rang baksa apsan nangrime a·ningni gamjinko cho·gipa biapona re·ange nieaha.
An·chingni CSO-rangoni manderangba kakketko sandienggipa aro nirokenggipa team-ni bak ong·e dongpaangaha.
“Nieani somoio, ua biapo niamgri cho·ani bosturangko nikjaha. Ua biapni bako pangchake aro chingni gita skang koborrangko man·soanio chinga bilaken chanchichipenga jeon official-rangni wenangna skang ma·sichongmoten cho·ani bosturangko donutoksokaha. Chingni changni chang mkol·molaniko dakgenchimoba ua salo a·ningni gamjinrangko cho·ani maming ja·kolrangko sandigipa dol man·jaha, cho·gipa manderang skangan koborangko man·soaha ine chanchichipanirang batengaha,” ine koborrangko parakatanichi CSO aganangaha.
November 14 tariko gital koborrangko man·soaha aro iani bidingo songni manderang parakataha jeon niamgri gamjinrangko cho·enggiparang mongsong cho·gipa biaponi sandirikotaoni man·jana gita bosturangko cho·gipa bipaoni chel·kalao chimonge dongenga, ine u·iataha.
“Ia koborrangko man·soaoni joljolan chingni membor-rang ua biapona ta·raken re·angaha. Bilake am·sandianiko dakani ja·man chinga a·ningoniko cho·gipa gamjinrangko chipe dongipa ge-88 box-rangko man·aha, jekon name dake chipe donaha. Songdonggipani daito ong·e aro a·tangko chel·chakgipa aro rakkigipa ong·e, chinga donugipa gamjinrangko rim·aha aro uarangko niamni gita kam ka·angchina Chokpot police station-na pakwatangaha. Am·sandianiko tom·tome aro daito ra·a gnang name dake matchotatna man·aha, manderangko chel·chake rakkianganni aro nikjoke kam ka·anirangan chingni dakna nangchenggipa kamrang ong·a,’ ine uamang aganangaha.
An·tangtangni man·gnina Garo Hills-ni ong·telaigipa gamjinrangko nosto ka·enga aro samtangtango dongenggiparangko nisiatenga, iarang gimikan sorkarini dilgiparangan jak dongpaani a·sel ong·enga ine CSO aganangaha.
Niamgri a·ningni gamjinrangko bikotenganina daito ra·e dakenggipa mandeni kosako niamni gita ta·rake ja·ku de·china dabienga, niamgri bikotna on·enggipao jak dongpagipa gimik aro quarry nokgipani kosako ja·ku de·aniko matnangataha.
Am·sandianiko dakjringchina aro bil man·gija bikotenggiparangko nikani joljolan chipatchina aro ua biapo bikotanina nangchapgipa permission aro license-rangko dongama dongja uarangni bidingo report-o ronggrike kam ka·china district administration, Forest aro SCPB-ko man·chape dingtang dingtang sorkari department-rangko uamang mol·molangaha.
“Chingni a·aoniko niamgri bikotaniko, gipinchina ra·anganiko ba badingchiwalataniko Chokpot-ni manderang aro a·jani united CSO-rang dakna on·jawa, iani bidingo chinga rongtalen parakataha. Chingnni ong·telaigipa gamjinrang chingni skang atchu ambirangoni man·rikrikbagipa gamjinrangsa aro iarangko chinga mikkangchiba ripingangkugen aro chel·chakangkugen,’ ine ua agandapangaha.
Iani bidingo a·dok sorkari aro bilko jako ra·e kam ka·enggiparang somoi gita chel·chakna man·ja ong·ode uamang rakbata ja·kurangko de·anggen ine CSO-rang mikrakataniko on·aha.