SHILLONG: Ramarango truck garirangoniko niam gri kajina gile ra·engani a·sel, koela salruragipa manderang noksan ong·na nangenga aro iandake niam gri kajina gilaoniko sorkariko chalaienggipa manderangsa namgniko man·skaenga ine Meghalaya Pradesh Congress Committee (MPCC)-ni president Vincent H Pala matnangataha.
Pala-ni aganani gitade, ramarango niam gri tangka paisarangko gile ra·anio a·dok sorkariko chalaienggipa manderangan jak donga aro ia kajinarangoniko a·dok sorkaride maming namgniko man·jaenga indiba dilgiparang an·tangtangsa man·gnirangkode ra·enga.
Koelarangko dakkiengoba, ramarango nangana batpile kajinarangko gile ra·engani a·selan koela dakkie man·gipa manderangba, koelarangko salgija dontokenga ine janapatengon, ramarango iandake a·dok sorkarini kajinarangko gildraengani a·selan koela bading chiwalenggipa manderang noksan ong·na nangtokenga ine MPCC-ni president matnangataha.
“Pilak biaprangon koelarangko manderang am·tokenga indiba sorkari, nangana batpile kajinarangko gilengani a·selan koela badinggiparang mamingkon dakna man·jaenga. Sorkarini kajina gile ra·anian batpilenga ong·ode maikai koela badinge cha·na man·gen? Koelarangko dakkiahani gimin manderang, an·tangtangni tangka paisarangko gamaha indiba koelarangko salengmitingon ramarango kajinarangko gamna nangkuenga. Iani giminsa koela dakkie man·giparang koelarangko salgija dontokenga. Ramarango kajina gilani namgnikode sorkari man·enga ong·ja indiba bilo ong·enggiparangsa man·enga. Uni giminsa anga pangnan iako aganronga, ia dilgiparang, tangka paisarangko jakkalsrete, dilgiparangko breenga aro dal·dalgipa nokrangko rikenga,” ine Pala aganaha.
Ia bilsini a·bachengachibara, a·doko dakkie galna dongipa koela metric ton (MT) 2,13,567.99-oni MT 3,563 koelarangkosan palna man·aiaha aro uan 1.67%-ni gitasan ong·aiaha ine committee-ni report-o parakahachim.
