Baljek Airport-ko taridapna ia jaon gong kr 50-ko AAI-na on·atgen: CM
TURA: Gital rikgipa Jengjal Police Station-ko Sombar salo, a·dokni Chief Minister Conrad K Sangma, a·dokni Director General of Police (DGP) Idashisha Nongrang aro dingtang dingtang dilgiparangni dongpaanio nokdonggae on·angaha.
Jengjal Police Station-ni gital building-ko nokdonggae on·anganio a·dokni Chief Minister, jinmana aganprakangengon, ia police station-ara mongsonggipa biapon ong·e, manderangna namen jakkaltobegipa police station ong·an baksana police-rangnaba kamrangko ka·togipa biap ong·a ine parakataha.
Jengjal Police Station-ko a·doko nambatsranggipa police station-rangoni damsa ine janapatengon, Jengjal Police Station-na gital nokko rikna gita a·arangko on·gilahani gimin a·dokni Chief Minister, Jengjal jolni Nokma aro songni manderangko mittelpilangaha.
Police station-rangko taridapna gita skangode a·dok sorkarini sanction ka·aniko nangani gimin somoirangko nangrongachim ine janapatskaengon, da·ode Police Infrastructure Renovation Fund dongahani gimin SP-rang an·tangtangan, sorkarina senggija police station-rangko taridapna man·aiaha ine Chief Minister parakataha.
“Ia police station-ko India sorkarini dongimin niamrango pangchakesa rikaha aro ia niamrango pangchake, pilak police station-rangkon apsan ong·atna gita chinga, a·dokni pilak police station-rangkon gital dake rikgen ba taridapna nanganirangko taridapgen,” ine Sangma aganaha.
Police department-o bangbang ong·e dongenggipa kamrangko ka·sinsin gapatengaha ine janapatengon, “Bangbang ong·e dongenggipa ge 3000 kamrangko gapatna gita kamrangko a·bachengaha aro da·o personal interview-ko ra·ani kamrang machotna siengaha,” ine Chief Minister aganaha.
Jengjal-ni Baljek Airport-ko ta·raken chalaina gita sorkari, ia airport-ko taridapna ia bilsini a·bachengachipakan Airport Authority of India (AAI)-na pakwate on·manaha ine janapatskaengon, crore 50-ni estimate-ko AAI, a·dok sorkarina on·aha aro Jengjal Airport-ko ta·raken taridapna gita ia jani gisepon a·dok sorkari gong kror 50 tangkarangko AAI-na on·anggnok ine Chief Minister parakataha.
Baljek Airport-ko taridapani kamrang matchotahaon, ia airport-oni ge 19 seat donggipa Air Alliance-ni sildorengrangko Shillong-ona watchenggnok ineba Chief Minister parakataha.
Ia Jengjal Police Station-ni gital nokko nokdonggae on·anganio a·dokni DGP Idashisha Nongrang-ba jinmana aganprakengon, an·tangni ia jolrango kam ka·chengmiting somoirangko gisik ra·atenba, ia gital police station-ko man·aniara Police Department-na mongsonggipa ja·kuko de·aniba ong·aha ine parakataha.
Ia gital police station-ko man·ahani gimin a·dokni Chief Minister-ko mittelpilangengon, mikkangchiba a·dokni police department, a·dokna aro a·dokni manderangna nambate dangdike on·angkuna kamrangko ka·angkugen ine Nongrang ku·rachakaniko on·angaha.
Gital Jengjal Police Station-ko nokdonggae on·anio, West Garo Hills a·jani Deputy Commissioner Vibhor Aggarwal, SP Abraham T Sangma, MIDC-ni Chairman James K Sangma aro gipinrangba dongpae bak ra·angtokaha.
