SHILLONG: A·dokni gitcham Chief Minister aro Trinamool Congress (TMC)-ni dilgipa Mukul Sangma-ba bakan Congress dolona re·bapilani cholrang donga ine manderangni gisepo chanchichipanirang ong·katengon, Mukul Sangma Congress dolona re·bapiltaigenchimoba ua aro Tura-ni MP Saleng A Sangma-ni gisepo meligrikna man·aigen ine Meghalaya Pradesh Congress Committee (MPCC)-ni president Vincent Pala a·kangataha.
Iani bidingo kobor ra·timgiparang baksa agangrikengon, skangonin Mukul aro Saleng meligiparang ong·a aro saksa sakgipinko mande ra·grikna changgiparang ong·ani gimin da·o Mukul Sangma, Congress-ona re·bapilgenchimoba, uamang sakgnini gisepo meligrikna man·aigen ine Pala parakataha.
Mukul Sangma an·tangde da·o dipet Congress dolona re·bapilani bidingo agangrika dongkuja ine talataniko on·angengon, ua an·tangba Mukul Sangma-ko party-ona rimbapilani bidingo Tura MP Saleng Sangma baksa chanchirima dongkuja ine MPCC-ni president parakataha.
2023 bilsini Assembly election-na skang Congress-ko wate katani ja·manoba da·o Mukul Sangma-ko Congress dolo rimnapna man·kuaigenma ine sing·anina aganchakaniko on·angskaengon, iani giminde All India Congress Committee (AICC)-sa chanchie nanga gita ja·kurangko de·gen ine Pala aganaha.
Skangode Mukul Sangma-an Congress dolo saksa namnikbatsrangako man·gipa dilgipa ong·achim indiba 2023 bilsini Assembly election-na skang ua an·tangni dilgiparangko rime, TMC-o napangskaahachim.
2023 bilsini Assembly election-o TMC, seat dambongakosan chena man·aiaha aro da·ona kingkingan Meghalaya a·doko party-ko bilakdapatna man·kujaenga.
2028 bilsion Assembly election-ko ong·attaina siengahani gimin Mukul Sangma, bakan gital political party-o napani cholrang donga ine bang·a manderangan chanchichiptokskaenga.
Uni jonggipa aro a·dokni gitcham minister Zenith M Sangma, TMC-ko wate Congress dolona re·bapilani ja·man, Mukul-koba Congress dolona re·bapilnaba gnang ine bang·a manderangan chanchichiptokengachim.
Salmanpara constituency-ni gitcham MLA Winnerson D Sangma-ba da·o Congress dolona re·bapilna siengaha aro unbaksana Zenith Sangma-ni jikgipa Sadhiarani M Sangma-ba Congress dolona re·bapilna siengaha ine kobor on·aha.
