SHILLONG: South Tura constituency-ni gitcham MLA John Leslee K Sangma, Budbar salo, Congress dolo napangpilaha aro uko Meghalaya Pradesh Congress Committee (MPCC)-ni dilgiparang, party-ona rimchaksoaha.
Meghalaya a·doko Congress dolko bilakatpiltaina rakbee kamrangko ka·engon, batanggimin salrangoba gitcham dilgiparang, Congress dolona re·bapile a·doko party-ko mangrakbatatani ong·ahachim.
Re·anggipa October 29 tarikosan, a·dokni gitcham Minister aro Rangsakona-ni gitcham MLA Zenith M Sangma-ba TMC-ko wate Congress dolona re·bapilaha aro da·o TMC-o napanggipa bang·bata membor-rangan, Congress dolona re·bapilna nidingtokengachim.
2022 bilsini bon·angachibara, a·dokni gitcham Chief Minister Mukul Sangma aro gipin MLA-rang baksa Congress dolko wate Trinamool Congress (TMC)-o napanggipa Salmanpara constituency-ni gitcham MLA Winnerson D Sangma-ba da·o Congress dolona re·bapilna siengaha ine kobor on·aha.
Kobor on·timgiparangni u·iatani gitade, Salmanpara-ni gitcham MLA Winnerson D Sangma-ko, re·baenggipa November-ni 26 tariko, Rangsakona-o Congress dolni tom·bimonganiko ong·atanio, party-ona rimchaksonaba gnang. Re·baenggipa 2026 bilsio ong·atna sienggipa GHADC election-o ua Congress doloni susana gita party tikitna dorgasto galenga ine kobor on·timgiparang parakataha.
Koborko on·ani gitade, Zenith M Sangma-ni jikgipa Sadhiarani M Sangma-ba apsan salon Congress dolo napangnaba gnang.
John Leslee K Sangma-ko Congress dolona rimchaksoangengon, Garo Hills-o manderang, NPP aro BJP-ni kamrango kusi ong·tokjaengaha aro Congress dolni sorkari rikpiltainikosa nangniktokengaha ine Budbar salo, MPCC-ni dilgiparang parakataha.
