SHILLONG: Ia sal somoirango a·dokni Congress dol, ka·sinsin bilakbapiltaiengahani gimin re·baenggipa 2026 bilsini a·bachengachibara ong·atna sienggipa Garo Hills Autonomous District Council (GHADC) election-oba chu·sokgipa ong·gen ine ka·dongsoenga.
Iani bidingo kobor ra·timgipa manderang baksa agangrikengon, GHADC election-o name dakna ka·dongenga aro ia election-o uamang man·a dipet candidate-rangko susaatna miksongenga ine Congress dolni dilgipa Manuel Badwar parakataha.
GHADC-o kam ka·giparangna NPP-chi dilenggipa a·dok sorkari, dormaharangko on·e dakchakahani gimin election-o nangchakeani donggenma ine sing·anina aganchakaniko on·angengon, ia dormahako district council-o kam ka·giparang ra·chakna nangjachim ine Badwar aganaha.
“Kam ka·giparangna dormahako on·aniara district council-ni bilko ra·sekna jotton ka·ani ong·a aro ian Sixth Schedule-ni kosako re·aniba ong·a,” ine ua aganaha.
Ian NPP-chi dilenggipa a·dok sorkarini, ‘tangka paisa mesoke, manderangko salna jotton ka·ani’ ong·a ineba Meghalaya Pradesh Congress Committee-ni secretary matnangataha.
Khasi aro Jaintia Hills a·jarangni gimin janapatskaengon, Congress dolona bang·en dilgiparang, mongsongbate chadamberang re·baengako nikna namen katchabea ine Badwar aganaha.
“Da·o dipet block ge·prakoniko candidate-rangko sandina nangani dongkuja indiba onbatgipa gadangonin party-ko mangrakatnasa nangenga. Chinga Ri Bhoi a·jaoba tom·aniko ong·ataha aro Jirang-oni Umroi-ona kingkingan Congress dolni bilakbapiltaianiko nikna man·engaha. Gipin constituency-rangoba apsan daken Congress bilakbapilengaha,” ine MPCC-ni dilgipa aganaha.
Badwar-ni parakatani gitade, West Khasi Hills a·jaoba Congress dolni tom·aniko mikkang antio ong·atna sienga aro ia tom·anio bang·a manderangan party-o napna sikenganiko paraktokaha.
“Da·o dipet Meghalaya a·doko chinga gitcham dilgiparang dongkujanaba gnang indiba songadam nokadamrango Congress bilakbapilengahani gimin chinga kusi ong·a. Chinga ka·sinsin bilakbatroroengaha aro mikkang bilsini June jaode chinga bilakbatgnok. Chinga party-ona gital dilgiparangkoba rimnapenga,” ine ua aganaha.
