SWGH a·jani project minggniko Assembly-ni Estimates Committee nipilanga

AMPATI: Nongpoh constituency-ni MLA Mayralborn Syiem-ni dilanichi, Mongolbar salo, Meghalaya Legislative Assembly-ni Estimates Committee, South West Garo Hills a·jani mongsonggipa project minggni, chong·motan Mahendraganj-ni Maternity & Child Hospital (MCH) aro Arenggre-ni Greater Ampati Water Supply Project-ko nipilangaha.
Ia project-rangko nianganio Nongpoh-ni MLA baksa re·bagipa Estimates Committee-ni gipin membor-rangara, Mawkyrwat MLA Renikton Lyngdoh Tongkhar, Ampati MLA Miani D. Shira, Rambrai-Jyrngam MLA Remington G. Momin, Umroi MLA Damanbait Lamare aro Selsella MLA Arbinstone B. Marak baksana Meghalaya Assembly Secretariat-ni official-rang ong·a.
Ia project-rangko nianganio, South West Garo Hills a·jani Deputy Commissioner Hema Nayak aro gipin official-rangba, Estimates Committee-ni membor-rang baksa dongpaaha.
Ia project-rangko niangengon, kamrang baditana kingking matchotaha aro mai dakgipa neng·nikanirangko chagrongna nangenga, uarangko committee niangenba, project minggnikon somoi gita matchotatchina ge·etangaha.
Skanggipao Estimates Committee-ni membor-rang, Mahendraganj-o rikenggipa MCH-ko niangaha aro uamangna Health Services (MCH&FW)-ni Director Dr Neela E Kharsanoh baksana gipin official-rang, ia biaprangko mesokataha.
Ia biapko niangani ja·man Ampati Circuit House-o ia project-ni chu·sokanirangko Estimates Committee-na talate on·angengon, ia MCH-ko 2022 bilsini November jao rikna a·bachengaha aro da·o 78 percent-ni gita kamrang matchotaha ine Health official-rang talatangenba, da·o dipet ia MCH-ko rikanio gong kror 10.98 koros ong·aha ine parakataha.
Ia MCH-ko 2026 bilsini March jaon matchotna tik ka·e donahaoba, chi, bijoli aro kam ka·giparangko ra·ani kamrang bangki dongkuenga ine official-rang talate on·angaha.
Indake ong·engon, Mahendraganj MCH-ko rikani kamrang, gipin a·jarango rikenggipa project-rangna bate ja·manchakenga ine Estimates Committee, suk ong·gijaniko parakangenba, PHE aro MePDCL gita dakgipa department-rang baksa nangrime kamrangko ta·rakbatatchina official-rangko ge·etangaha.
Iana skang Estimates Committee, Betasing C&RD Block-ni ning·o rikenggipa Greater Ampati Water Supply Project-koba niangaha aro uamang baksa PHE Ampati-ni Executive Engineer SP Marak, PHE Ampati-ni SDO LA Sangma baksana gipin official-rangba dongpaaha.
Ia Water Supply project-ko rikanio dingtang dingtang neng·nikanirangko chagrongna nanggenchimoba 89 percent-ni gita kamrang matchotengaha aro ia project-ko matchotahaode, ian Ampati aro Betasing-ni wilwilao donggipa dam 74 songni te 7500-na baten nokdangrangna namgni ong·gnok ine PHE official-rang, Estimates Committee-na talate on·angaha.